<p> རྩོམ་རིག་གི་བཟློག་པ་ཆེན་མོ།</p><p> མགར་རྒད་པོས།</p><p>ལྷག་བསམ་གངས་དཀར་ལྷུན་པོའི་ལྟོ་བ་ལས།།</p><p>རང་བྱུང་ལྷུན་གྲུབ་བཀོད་པ་རྩོམ་གྱི་གཤིས།།</p><p>དུངས་པ་རང་ཚུགས་ཟབ་པ་རིན་ཆེན་ནོར།།</p><p>ལོག་པ་ངན་དགུ་འཛོམས་པས་མ་བསླད་ཅིག།</p><p>སྙན་ངག་ཡིན་ཞེས་ལ་བཤད་ལུང་བཤད་བྱེད།།</p><p>གྲགས་རྩོམ་ཡིན་ཞེས་མི་བཤད་དགུ་བཤད་བྱེད།།</p><p>མདོར་ན་སྙན་ངག་བཙོང་རྒྱུ་ཡིན་ཡང་ཟེར།།</p><p>མ་ཟད་རྩོམ་རིག་ཨུ་ཡོན་འཇིགས་རབ་ཟེར།།</p><p>མཐུན་གྲོས་ནང་ན་ཡོད་པས་ཆེ་རབ་ཟེར།།</p><p>ཚགས་པར་རྩོམ་སྒྲིག་ཡིན་པས་མཐོ་རབ་ཟེར།།</p><p>མ་ཤི་མི་རབས་ཆགས་པའི་དཔུང་ཡོད་ཟེར།།</p><p>རྩོམ་རིག་ས་སྐྱོང་ཡིན་ཞེས་པར་ཡང་འགེལ།།</p><p>མདོར་ན་ཡོད་ཚད་རུལ་ནས་མྱགས་འོང་དུས།།</p><p>ལོ་རབས་བརྒྱད་ཅུ་པ་ཚོའི་དོ་ཟླ་མིན།།</p><p>སྙན་རྩོམ་སྐུ་ཞབས་ལྗང་བུའི་ཤོད་ཙམ་མིན།།</p><p>བརྩམས་སྒྲུང༼ཝ་ནག་ལུང་པའི༽ཟུར་ཙམ་མིན།།</p><p>སྒྲུང་ཐུང༼ཉིན་གཅིག་ཆོ་འཕྲུལ༽ཕྱེད་ཙམ་མིན།།</p><p>སྒྲུང་རིང༼རླུང་དམར་འུར་འུར༽ཆ་ཙམ་མིན།།</p><p>རྩོམ་བཏུས༼གཙང་པོའི་ཕ་རོལ༽ཕྱོགས་ཙུག་མིན།།</p><p>ཚིགས་བཅད་འཇུ་སྐལ་བཟང་པོའི་སྣེ་ཙམ་མིན།།</p><p>ལྷུག་རྩོམ༼ཁ་བའི་རྣམ་ཤེས༽བཏུས་ཙམ་མིན།།</p><p>མདོར་ན་གཞུང་དང་སྒེར་གྱིས་རྩོམ་བསྡུར་དུས།།</p><p>རྩོམ་གྱི་བཟང་ངན་སྒོར་དང་འབྲེལ་བར་རག།</p><p>རྟགས་མའི་ཤོམ་ནི་བོང་བུ་པགས་གྱོན་འདྲ།།</p><p>རྩོམ་རིག་དུས་ངན་མཐའ་ལ་ཐུག་པའི་དུས།།</p><p>ཁྱུང་ཚབ་ཁ་ཏྭས་བྱེད་པ་བཟློག་གྱུར་ཅིག།</p><p> དགུན་ཉི་ལྡོག་ཉིན།</p>