<p style="text-align: center;"><b style="font-size: 22px;">ཀུན་བཟང་སློབ་རའི་འགྱུར་ཁུགས།</b></p><p><br></p> <p><b style="font-size: 20px;">德润卡加道最美朗读者</b></p><p style="text-align: right;">——道吉才让</p><p><br></p> <p style="text-align: center;"><span style="font-size: 20px; color: rgb(1, 1, 1);">【书香德润】栏目</span></p><p style="text-align: center;"><span style="font-size: 18px; color: rgb(1, 1, 1);">第十四期</span></p> <p style="text-align: center;"><b style="font-size: 22px;">ལེ་ཚན་བཅུ་བཞི་བ།</b></p> <p style="text-align: center;"><b>1 ཕ་སྐད།</b></p><p style="text-align: center;"><b>རྩོམ་པ་པོ་ལྷོ་བ་འགྱུར་མེད་རྡོ་རྗེ།</b></p><p style="text-align: center;"><b>1</b></p><p>ཕ་སྐད་ནི་ཕ་མེས་ཀྱིས་ངེད་ཅག་ལ་གནང་བའི་ལེགས་སྐྱེས་ཀྱི་ཐོག་མ་ཡིན་པདང་། ངེད་</p><p>ཅག་གི་དྲན་པའི་ཁྲོད་དུ་ལུས་པའི་མཐའ་མཇུག་གི་སྙན་དབྱངས་ཡིན། གངས་དཀར་ཏི་སེའི་གཡས་</p><p>གཡོན་ཧི་མ་ལ་ཡའི་ཕྱི་ནང་། རྨ་རྒྱལ་སྦོམ་རའི་ཉིན་སྲིབ། ཁ་བ་དཀར་པོའི་ལྷོ་བྱང།ཕ་སྐད་ནི་བརྗིད་</p><p>ཆགས་གངས་རི་སྟོང་གི་བླ་སྲོག་ཡིན།</p><p>སྟོང་ཀྱི་མངའ་རིས་སྐོར་གསུམ། བར་གྱི་དབུས་གཙང་རུ་བཞི། སྨད་ཀྱི་མདོ་ཁམས་སྒང་དྲུག ཕ་སྐད་ནི་ཁ་བ་ཅན་གྱི་སྙིང་གི་འཕར་ལྡིང་དང་། དབུགས་ཀྱི་འབྱིན་རྔུབ་ཡིན།</p><p style="text-align: center;"><b>2</b></p><p>འཇིགརྟེན་ཆུང་ནས་ཆུང་དུ་འགྲོ་དུས། བོད་ཁམས་ཆེ་ནས་ཆེ་རུ་གྱུར་ཅིང་ །འཛམ་གླིང་</p><p>གཞི་གཅིག་ཏུ་འདྲེས་པའི་དེ་རིང་། བསོད་ནམས་ཞིང་གི་མི་རྣམས་ཀྱིས་ཕ་སྐད་བསྐྱུར་ཞིང་ཕྱོགས་</p><p>བཞིར་འཐོར་གྱིན་འདུག </p><p>ཆུ་ཆེན་གྱི་རབ་ཁ་རུ།ངེད་ཅག་གི་ཕ་སྐད་ལུས་ཟུངས་ཟད་པའི་རྒན་པོ་བཞིན།</p><p>གཅིག་པུས་ཕ་རོལ་སྒྲོལ་བྱེད་ཀོ་གྲུ་སྲུང་ཞིང་གདའ།</p><p>གྲོང་ཁྱེར་གྱི་གྲུ་ཟུར་ན། ངེད་ཅག་གི་ཕ་སྐད་འགོས་ནད་བྱུང་བའི་བུ་མོ་ཉམ་ཐག་ཅིག་ལྟར། ཀུན་</p><p>གྱིས་འཛེམ་ཞིང་། དག་གཙང་དྲོད་འཇམ་གྱི་གནས་ཚང་ཞིག་མ་རྙེད།</p><p>གནའ་མི་བོད་ཀྱི་གཏམ་དཔེ་ལ། ཕ་ཡུལ་བརྗེད་ཀྱང་ཕ་སྐད་མི་བརྗེད་ཟེར། ཚེ་གང་ཕ་སྐད་</p><p>བཤད་པའི་ཨ་མེས་ཨ་ཕྱི་ཡིས་གློ་བུར་སྨྲ་བ་བཅད་དེ། ཅི་ཡང་བརྗོད་མ་བྱུང་། སྐད་ཆ་བཤད་རན་</p><p>ལ་སོན་པའིཚ་བོ་ཚ་མོ་ནི། མིག་རྒྱང་ཅན་དུ་རློམ་པའི་ཕ་མས་ཕ་སྐད་སློབ་པའི་དབང་ཆ་ཕྲོགས།</p><p>ལྗོན་པ་དང་བྲལ་བའི་ལོ་འདབ་རྣམས་སྟོན་རླུང་ཁྲོད་དུ་རང་མདངས་ཤོར། ཁ་ཕྱོགས་ནོར་</p><p>བའི་ལུ་གུ་ཡང་བུ་ཡུག་ཁྲོད་ན་འདར་སིག་སིག</p><p>ཨེ་མ། མ་ཎི་གླུ་རུ་ལེན་པའི་དུས་འདི་ལ། ཕ་སྐད་ཀྱི་བཀྲག་མདངས་སུ་ཡིས་བསྒྲིབས། རྩ་བ་དོར་</p><p>ནས་ཡལ་གར་འཇུས་པ་དེང་གི་དུས། བདག་གི་ཉམ་ཆུང་ཕ་སྐད་སྙིང་རེ་རྗེ།ཁ་སང་ཉི་མ་བཞུད་</p><p>ཤུལ་དུ། དོ་ནུབ་ཟླ་འོད་འགྱེལ་ཤུལ་དུ། ལོ་རེ་ནས་ལོ་རེར་དབུལ་ཞིང་ཕོངས་པར་འགྱུར་བཞིན་པའི་</p><p>ཕ་སྐད་འདི་ཉིད། སང་ཞོགས་ད་དུང་བདག་ལ་དབང་སྲིད་དམ། </p><p style="text-align: center;"><b>3</b></p><p>ལྷོ་ཁའི་ཡར་ཀླུང་ནས་གངས་ཅན་ལྗོངས་ཆེན།ཕ་སྐད་ནི། ཕ་སྤྲེའུ་བྱང་ཆུབ་སེམས་དཔའི་</p><p>བྱམས་བརྩེ་དང་། མ་བྲག་སྲིན་མོའི་འཛུམ་མདངས་ཡིན་།</p><p>ཕ་སྐད་ནི། བྱེའུ་ཆུང་ཅོ་གས་རྩྭ་ཐང་ལ་ཕུལ་བའི་སྙན་ཚིག་དང་། ཁུ་བྱུག་སྔོན་མོས་</p><p>ཞིང་གྲོང་ལ་བླངས་པའི་གླུ་དབྱངས། ཞོགས་པའི་དུ་བས་སྦྲ་ནག་ཁང་ཁྱིམ་དག་ལ་འཁྲབ་པའི་སྐོར་</p><p>བྲོ་ཡིན།</p><p>ཕ་སྐད་ནི། རྟ་ནོར་ལུག་གསུམ་གྱི་དགོད་སྒྲ་དང་། གྲོ་ནས་སྲན་གསུམ་གྱི་ལང་ཚོ་</p><p>ཡིན། ཡུམ་བུ་བླ་སྒང་ནས་རྩེ་པོ་ཏ་ལ།</p><p>ཕ་སྐད་ནི་སྒྲུང་ལྡེའུ་བོན་གསུམ་གྱི་བསིལ་རླུང་དང། དབྱངས་གསལ་སོ་བཞི་ཡི་</p><p>གཤོག་རླབས་ཡིན།</p><p>ཕ་སྐད་ནི། བཅུ་ཕྲག་རིག་པའི་གནས་ཀྱི་གད་རྒྱངས་དང་། འཛམ་གླིང་གེ་སར་</p><p>རྒྱལ་པོའི་སྒྲུང་རབས་ཀྱི་གཟི་བྱིན། སྲིད་པ་ཆགས་གླུའི་འགྱུར་ཁུགས་ཀྱི་བཞུར་རྒྱུན་ཡིན། </p><p>ཕ་སྐདནི། གངས་ཅན་འགྲོ་བས་ཕྱི་ལ་གཟིགས་པའི་རྒྱང་ཤེལ་དང་། མ་འོངས་ བསྐྱར་དར་</p><p>འབྱུང་བའི་བློ་གྲོས་ཀྱི་གཏེར་མཛོད་ཡིན།</p><p style="text-align: center;"><b>4</b></p><p>ངེད་ཅག་ནི་ཕ་སྐད་ཀྱི་བུ་ཕྲུག་ཡིན། ངེད་ཅག་གི་ཕ་མ་ནི་བོད་ཀྱི་སྐད་དང་ཡི་གེ་ཡིན། </p><p>ཕ་སྐད་ནི་ངེད་ཅག་བྱེས་སུ་འགྲིམ་དུས་ཀྱི་གནས་མལ་དྲོན་པོ་དང། ངེད་ཅག་ལ་མུན་པའི་ཁྲོད་</p><p>དུ་ལམ་བཟང་སྟོན་པའི་སྒྲོན་མེ་ཡིན།</p><p>ཕ་སྐད་ནི་ངེད་ཅག་གྲང་བའི་དུས་ཀྱི་མེ་དཔུང་དང་། ཚ་བའི་དུས་ཀྱི་སྦྲང་ཆར།</p><p>བཀྲེས་པའི་དུས་ཀྱི་མར་རྩམ། སྐོམ་པའི་དུས་ཀྱི་འོ་ཞོ་ཡིན།</p><p>ཕ་སྐད། ངེད་ཅག་བསམ་པ་སྡུག་དུས་ཀྱི་སྐྱོ་རོགས།</p><p>ཕ་སྐད། ངེད་ཅག་ལ་མོ་རྒལ་དུས་ཀྱི་ལག་རྟེན།</p><p style="text-align: center;"><b>5</b></p><p>ལྷ་ཡུལ་དུ་ངེད་ཅག་གི་ཕ་སྐད་ཡོད་དམ། དམྱལ་ཁམས་སུ་ངེད་ཅག་གི་ཕ་སྐད་ཡོད་དམ།</p><p>ཡི་དྭགས་དང་ལྷ་མིན་གྱི་གནས་སུ་ངེད་ཅག་གི་ཕ་སྐད་ཡོད་དམ། མི་ཡི་ཡུལ་འདིར། ངེད་ཅག་གི་</p><p>ཕ་སྐད་ཀྱིས་འཕོ་ལྟུང་གི་སྡུག་བསྔལ①མྱོང་གིན་འདུག་ཚ་གྲང་དང་བཀྲེས་སྐོམ་གྱི་སྡུག་བསྔལ་མྱོང་</p><p>གིན་འདུག </p><p>གངས་རིའི་ལྗོངས་འདིར། ངེད་ཅག་གི་ཕ་སྐད་ཀྱིས་འཐབ་རྩོད་ཀྱི་སྡུག་བསྔལ་མྱོང་གིན་འདུག</p><p>ཕ་སྐད་ནི་དུད་འགྲོ་ཞིག་ཡིན་ན་དགའ་བ་ལ། ཉིན་མཚན་ཀུན་ཏུ་སྐྱེ་འགྲོ་ཡོངས་ཀྱིས་བཀོལ་ཞིང་</p><p>སྤྱོད་པའི་སྡུག་བསྔལ་མྱང་དགོས་ན་སྐྱིད་པ་ལ་ཨང། </p><p style="text-align: center;"><b>6</b></p><p>གནམ་སའི་བར་དུ་སྤྲིན་དཀར་དང་གླག་རྒོད་མེད་ཀྱང་ཆོག་མོད། ཉི་ཟླ་གཟའ་སྐར་མེད་མི་</p><p>རུང། </p><p>མི་རིགས་ཤིག་ལ་འཛུམ་མདངས་དང་གླུ་སྐད་མེད་ཀྱང་ཆོག་མོད། ལོ་རྒྱུས་དང་སྲོལ་རྒྱུན་མེད་</p><p>མི་རུང།</p><p>མགོ་ནག་བོད་མིར་སློག་པ་དང་རྩམ་པ་མེད་ཀྱང་ཆོག་མོད། རང་གི་ཕ་མེས་ཀྱིས་བྱིན་པའི་སྐད་</p><p>དང་ཡི་གེ་འདོར་ག་ལ་རུང། </p><p>ཕ་སྐད་མེད་པའི་ཉིན་མོར། ངེད་ཅག་ནི་རང་གི་སྒོ་མདུན་དུ་གཞན་ལ་ལྟོ་གོས་སློང་བའི་སྤྲང་བོ་ཞིག་དང་འདྲ་སྟེ། ཐོབ་འོང་</p><p>བ་ནི་ངོ་ཚ་དང་འཕྱ་དམོད་ཡིན་ལ།འཆོར་སྲོད་པ་ནི་འཇིག་རྟེན་གྱི་ལ་རྒྱ་རེད།</p><p style="text-align: center;"><b>7</b></p><p>ཆོས་རྒྱལ་མེས་དབོན། ཕ་སྐན་ནི་སུམ་གཉིས་ས་ཡི་དཀྱིལ་འཁོར་ན་གཡོ་བའི་མཁས་</p><p>མཛངས་ཀྱི་བ་དན་ཡིན། </p><p>རྒྱ་བོད་ལོ་པཎ། ཕ་སྐད་ནི་བཀའ་དང་བསྟན་བཅོས་ཀྱི་རྣམ་དག་གསུང་དབྱངས་ཡིན།</p><p>གངས་ལྗོངས་མཁས་དབང་རིམ་བྱོན་། ཕ་སྐད་ནི་གཞུང་ལུགས་རབ་འབྱམས་སྨྲ་བའི་དབྱངས་</p><p>རྟ་སྙན་མོ་དང་། འཆད་རྩོད་རྩོམ་པའི་རིག་པའི་གད་རྒྱངས་ཡིན། ཨ་མདོ་བ། དབུས་གཙང་བ། </p><p>ཁམས་པ། ཀུན་གྱིས་ཕ་སྐད་གཅིག་པ་སྨྲ། མོན་པ། ལྷོ་བ། སྟེང་བ།མོ་གཙོ་བ། ཀུན་གྱིས་ཕ་སྐད་</p><p>གཅིག་པ་སྨྲ། འབྲུག་པ། འབྲས་ལྗོངས་པ། ལ་དྭགས་པ། སྦལ་ཏི་བ། རྟ་མང་། ཤར་བ། བ་ཏ་བ།</p><p>ཀུན་གྱིས་ཕ་སྐད་གཅིག་པ་སྨྲ།</p><p>འཇང་ཡུལ་གྱི་བྷོ་མི་ཡང་གདོད་དམར་བོད་ཀྱི་རྒྱུད་པ་ཡིན། ཕ་སྐད་ནི་རང་རིགས་སྤུན་</p><p>ཟླའི་བློ་སེམས་གཅིག་ཏུ་སྦྲེལ་བྱེད་ཀྱི་གསེར་ཟམ་དང་། ཕྱོགས་བཞིའི་ཤེས་རིག་ནང་དུ་བསུ་</p><p>བའི་དྲི་མེད་ལྷ་དར་ཡིན།</p><p>ཕ་སྐད་ནི་ཨ་ཕའི་དཀར་ཡོལ་དུ་འཁྱིལ་བའི་ནས་ཆང་སྔོང་མོ་དང། ཨ་མའི་སོར་བར་ན་རྒྱུ་བའི་</p><p>ཕྲེང་བའི་རང་སྒྲ་ཡིན།</p><p>ཕ་སྐད་ནི་གངས་ཅན་སྟག་ཤར་ཀྲོང་ངེར་འགྱིང་བྱེད་ཀྱི་སྒལ་ཚིགས་དང་། བསིལ་ལྗོངས་སྨན་</p><p>ཆུང་མདུན་དུ་སྐྱོད་བྱེད་ཀྱི་ཞབས་ཟུང་ཡིན།</p><p>ཕ་སྐད་ནི་འཛམ་གླིང་བོད་མི་ཡོངས་ཀྱི་རླུང་རྟའིདར་ཆེན་ཡིན་། དུས་དེ་རིང་ནས་བཟུང་། </p><p>གནས་གང་དང་དུས་ནམ་ཡིན་རུང་། ཕྲུ་གུ་ཨ་མའི་ནུ་ཞོ་ལ་དགའ་བ་ཇི་བཞིན་ང་ཚོ་རང་</p><p>གི་ཕ་སྐད་ལ་དུངས།</p><p>དུས་དེ་རིང་ནས་བཟུང་། ང་ཚོས་ལ་རྒྱ་ཅན་གྱི་སྐྱེ་བོ་ཞིག་གི་ཚུལ་གྱིས་། སྲིད་པའི་དཀོག་</p><p>ནོར་ཏེ་། རང་གི་ཕ་སྐད་ངག་ལ་དྲངས་ནས། གནམ་འོག་གི་མི་ཀུན་ལ་བཀྲ་ཤིས་བདེ་ལེགས་ཞུ། </p> <p>编辑:贺华</p><p><br></p><p>单位:卡加道小学</p><p><br></p><p>审核:旦知草</p>