<p>འཕགས་པའི་ཡུལ་ནས་ངལ་དུབ་ཁྱད་བསད་ཀྱིས།།</p><p>རིག་པའི་ཕྱི་མོ་ཀུན་ལ་ལེགས་བསླབས་ནས།།</p><p>གངས་ཅན་བོད་ཀྱི་སྐད་བརྡ་རིག་པའི་གཞུང་།།</p><p>དབྱངས་གསལ་ཡི་གེ་རྩོམ་མཛད་མཆོག་ལ་འདུད།།</p><p>གོང་རིམ་ཏང་དང་འོག་གི་འབད་པ་ལས།།</p><p>གཉིས་སྟོང་གཉིས་ལོའི་ས་ག་ཟླ་བའི་ནང་།།</p><p>བོད་རྒྱལ་འཁྲུངས་ཡུལ་གནས་མཆོག་ཅོ་ནེ་རུ།།</p><p>བོད་ཡིག་མཐུན་ཚོགས་ཚུགས་པའི་བསྐལ་བ་ཤར།།</p><p>ཡི་གེའི་གཅེས་ནོར་བཞི་ཡིས་ལེགས་གྲུབ་པའི།།</p><p>ངོ་མཚར་མཚོན་རྟགས་ཡི་གེའི་གཟུགས་རིས་གྱིས།།</p><p>དུས་གསུམ་འཆར་བའི་དོན་གྱི་སྙིང་ཁུ་ཡང་།།</p><p>ས་འཛིན་དཀར་པོའི་པང་དུ་ལྟེམས་སེར་འཁྱིལ།།</p><p>སློབ་དཔོན་གུ་དྲག་ཡིག་མཁན་སངས་བཀྲ་དང་།།</p><p>སྒྱུ་རྩལ་རྩོམ་གྱིས་ཕྱུག་པའི་ཕྱག་རྡོ་ཡིས།།</p><p>ལེགས་བཤད་གསུང་གི་བདུད་རྩི་འི་ཆར་གྱི་རྒྱུན།།</p><p>སེམས་ཀྱི་ཞིང་ས་བརླན་པའི་རྒྱུ་རུ་འཕོས།།</p><p>ཀྲུའུ་ཞི་ཚེ་དཔག་ཨ་ཁུ་ཆོས་གྲགས་དང་།།</p><p>ཡིག་མཁན་ཀུན་གྱི་ལག་པའི་སོར་མོའི་རྩལ།།</p><p>ཅི་དགར་ངོམས་པའི་འགྲེམས་སྟོན་འདི་འདྲ་ཡང་།།</p><p>མིག་གི་ལོངས་སྤྱོད་སེམས་ཀྱི་གསོས་སུ་སྨིན།།</p><p>ཐུ་མིའི་བཞེད་གཞུང་ཁྱུང་པོའི་ཕྱག་རྩལ་གྱི།།</p><p>ཐིག་བཤད་ཐེམ་སྐས་དཀྱིལ་ལ་མ་འཛེགས་པར།།</p><p>རང་དགར་བྲིས་པས་ས་གསུམ་གང་ན་ཡང་།།</p><p>བྲིས་ཀྱི་བ་གམ་མཐོན་པོར་ག་ལ་སླེབས།།</p><p>སྣ་ཚོགས་ཡི་གེ་འབྲི་ཀློག་ཚེགས་མེད་པར།།</p><p>ཚེ་རབས་ཕྲེང་བར་བསིལ་ལྡན་བོད་ཡུལ་དུ།།</p><p>བཀའ་བསྟན་གཞུང་ལུགས་དག་ལ་ལེགས་མཇལ་ནས།།</p><p>འགྲོ་ཀུན་ཞི་བདེའི་དཔལ་ལ་ལོངས་སྤྱོད་ཤོག།</p><p><br></p> <p> ཡིག་གཟུགས་མཐུན་ཚོགས་ནས། </p><p> ༢༠༢༠-༡༠-༣༠</p>