<p>༄༅༎སྲིད་པ་བདེན་བྲལ་འཇའ་ཡི་ཕོ་བྲང་ནས།།</p><p>ཟོལ་མེད་འཛུམ་མདངས་དགེ་སློབ་གདོང་དུ་བརྟས།།</p><p>རེ་སྙེགས་གསེར་གྱི་དོ་ཤལ་མགུལ་དུ་བསྒྲོན།།</p><p>མ་ཡུམ་གླིང་འདིར་གྱེས་ཕྱག་དང་པོ་འཚལ།།</p><p>སྟོན་གསུམ་ལོ་འབྲས་འཐུ་བའི་སོ་ནམ་བཞིན།།</p><p>དེ་རིང་རྒྱལ་ཁའི་བྱ་ཁྱུ་འདི་ནས་འཕུར།།</p><p>རྒྱལ་ཁ་དང་རེ་འདུན་སྟོང་གི་ཀློང་ནས་རྨ་ཆེན་རྫོང་གངས་རི་བཅའ་སྡོད་སློབ་གྲྭའི་ལོ་རིམ་དྲུག་པའམ་སྐལ་བཟང་མེ་ཏོག་འཛིན་གྲྭས་མཐར་ཕྱིན་མཛད་སྒོ་སྤེལ་བ།</p> <p>བུ་བཟང་རིག་པའི་བུད་པའི་དགའ་དོད་དང་།། </p><p>གཡུར་ཟའི་འབྲས་བུ་སྨིན་པའི་རྟེན་འབྲེལ་དུ།། </p><p>བརྩོན་པའི་སྐུལ་སོགས་དགྱེས་པའི་ཕུལ་བ་ལགས།། </p><p>ལེགས་ཚོགས་གྲུབ་འབྲས་མུ་ནས་འབད་པར་འཚལ།། </p><p>མགོ་ལོག་སློབ་འབྲིང་དང་ནི་གཙང་གསུམ་ཚང་།། </p><p>ཚུལ་ལྡན་གླིང་གར་རེ་བས་སྙེག་པ་ལེགས།།</p><p>རང་སློབ་གྲྭའི་འགོ་བ་རྣམས་པས་ཐེངས་འདིའི་རྒྱུགས་འབྲས་འབུར་ཐོན་སློབ་མར་གཟེངས་རྟགས་གནང་བཞིན་པ།</p> <p>བདེ་གཤེགས་སྙིང་བོའི་ཡོན་ཏན་ཁོ་ལག་རྫོགས།།</p><p>སྙིང་རྗེ་སྤྲིན་དཀར་འབོལ་ལེར་ལྡིང་བ་ཡི།།</p><p>ལོ་ངོ་དྲུག་གི་བྱས་རྗེས་ས་བོན་དཀར།།</p><p>དམ་པ་ཁྱེད་ཚོར་ལེགས་པའི་སྐྱེས་འདི་ཕུལ།།</p><p>སྐུ་ཚེ་རི་རབ་བརྟན་པའི་རྟེན་དུའོ།།</p><p>སློབ་བུ་རེ་ནས་རྩོམ་ཐུང་འགའ་དང་ལོ་ངོ་དྲུག་གི་རིང་མ་ཡུམ་སློབ་གླིང་ནས་གཡུར་ཟའི་འབྲས་བཟང་དེ་དེབ་ཆུང་དུ་བཀོད་པ་དང་གཟེངས་རྟགས་སོགས་དྲན་རྟེན་དུ་ཕུལ་བ།</p> <p>མི་ལོ་དྲུག་གི་སྦྱངས་འབྲས་བསྡུས་པ་ཡི།།</p><p>རེག་ཟིག་ཆུང་ངུ་ཆུང་ཆུང་གྲོགས་ལ་འབུལ།།</p><p>སློབ་གྲོགས་རྣམ་དཔྱོད་ཅན་གྱིས་ནན་གྱིས་ལྟོས།།</p><p>མཐོང་ཐོས་ཉར་པའི་ཟིན་དེབ་ཆུང་ངུ་འདིས།།</p><p>ཁྱེད་ཚོའི་རྒྱུགས་ལ་གྲུབ་འབྲས་གཡུར་དུ་སྨོན།།</p><p>སློབ་གླིང་འདི་ཡི་སྲོལ་བཟང་རྒྱུན་འབྱམས་ཤིག ། </p><p>རེ་བ་དང་སྨོན་འདུན་རུམ་གང་ཁུར་ནས་ཐེངས་རྗེས་མའི་མཐར་ཕྱིན་འཛིན་གྲྭར་ལེགས་སྐྱེས་སུ་ཁོ་ཚོར་མཁོ་བའི་སློབ་སྦྱོང་གི་རྒྱུ་ཆ་གང་མང་ཕུལ།</p> <p>ལེགས་པའི་ལམ་ནི་སྟོན་མཛད་དགེ་བའི་བཤེས།།</p><p>ཟབ་བརླིང་རིག་པའི་ཞིང་མཆོག་མ་ཡུམ་གླིང་།།</p><p>ལོ་ཟླའི་ཁུགས་པ་རེ་རེའི་དཀྱོགས་མཚམས་ནས།།</p><p>སེམས་ཀྱིས་གཉོར་ཞིང་མིག་གིས་འཚོས་པ་ཡི།།</p><p>གཞལ་མེད་དྲིན་གྱི་མཐུ་ལ་གུས་ཕྱག་བགྱི།།</p><p>ལོ་ངོ་དྲུག་རིང་གཉོར་ཞིང་སྐྱོང་བའི་མ་ཡུམ་སློབ་གྲྭའམ་དགེ་རྒན་ཡོངས་ལ་དྲན་རྟེན་གནང་བ་རྟེན་འབྲེལ་ལེགས།</p> <p>ཞལ་ཟས་ཡག་པོ་རང་ཁྱིམ་སླེབས་དང་འདྲ།།</p><p>བྱམས་བརྩེས་ལེགས་སྦྱིན་ཨ་མའི་གཅེས་སྐྱོང་ལྟར།།</p><p>མི་ལོ་དྲུག་གི་ཡུན་ལ་སྐྱོང་མཛད་པའི།།</p><p>དྲིན་ལྡན་མ་བྱན་རྣམས་ལ་ཞལ་དྲོ་ཞུ།།</p><p>རང་གི་བུ་ལྟར་སྐྱོང་ཞིང་དཀའ་སྡུག་ཁྱད་དུ་བསད་ནས་སློབ་བུ་ཚོར་ཟས་ཇ་དྲོད་མོ་གནང་མཁན་གྱི་ལས་བཟོ་བ་ཡོངས་ལ་གུས་པའི་ཞབས་དུའོ།</p> <p>ཉིན་བྱེད་དང་མཚུངས་དྲིན་གྱི་ས་འཛིན་ཆེ༎ </p><p>སྐྱོང་མཛད་གང་དེ་ང་ཡི་དགེ་བའི་བཤེས༎ </p><p>དགའ་སྡུག་འཐབ་པའི་ཉིན་མོ་འདི་ཉིད་ལ༎ </p><p>སྐྱེས་ཕྲན་འདི་ཉིད་དྲིན་གྱི་རྟེན་དུ་འབུལ༎</p><p>སློབ་གཙོ་དོན་གྲུབ་ལགས་ཀྱིས་མཐར་ཕྱིན་འཛིན་གྲྭའི་དགེ་རྒན་རྣམས་པར་མ་ཎི་ཡིག་དྲུག་གི་བྲིས་ཐང་གསེར་བྲིས་མ་ལེགས་སྐྱེས་སུ་ཕུལ་བའོ།</p> <p>ལོ་ངོ་དྲུག་གི་ཕྱིར་མིག་རིང་མོའི་ཀློང་རིམ་ན།། </p><p>དགའ་སྐྱོ་ཟུང་གི་འཚོ་བའི་མངར་ཁ་འཁྱིལ།། </p><p>དགའ་བའི་གླུ་སྒྲས་ཁེངས་ཤིང་འཛུམ་མདངས་རྒྱས།། </p><p>གྱེས་བའི་ལམ་ལ་ཞུགས་དུས་སྐྱོ་བའི་མཆི་མ་འཐོར།།</p><p>མཇུག་མཐའི་དུས་ཚོད་དེ་དྲིན་ལྡན་གྱི་དགེ་རྒན་རྣམས་དང་སྙིང་ཉེ་བའི་སློབ་གྲོགས་ཚོ་དང་མཉམ་དུ་རྩེད་དགོད་ཀྱི་དཔལ་ལ་རོལ་བཞིན་པ།</p> <p>ལས་ཀྱི་དབང་གིས་ང་ཚོ་འདི་རུ་འཛོམས། །</p><p>འགྱུར་མེད་བརྩེ་བའི་རུ་མ་ལྷམ་མེར་ཆགས།།</p><p>འོན་ཀྱང་གྱེས་གདུང་ཐུ་མོའི་གཞོམ་གཞིག་གིས།། </p><p>མི་འདོད་སྐྱོ་བའི་མཆི་མ་དབང་མེད་ཤོར།།</p><p>དགེ་སློབ་བར་གྱི་བརྩེ་བ་ཟབ་མོ་དེ་དང་ལོ་ངོ་འདི་དག་གི་དགའ་སྐྱོ་ཐམས་ཅད་གྱེས་ཁར་མིག་ཆུར་བྲིས་ནས་མ་ཡུམ་སློབ་གླིང་དང་གྱེས་ཕྱག་འཚལ།</p> <p>ལོ་ངོ་དྲུག་གི་བཞུད་ལམ་ཁྲོད་ང་ཚོ་མཉམ་དུ་དགོད་མྱོང་ལ་ངུ་ཡང་མྱོང་། </p><p>དེ་ནི་ཀ་ཁའི་དབྱངས་རྟ་ངག་ལ་གྱེར་བའི་ལོ་ངོ་དྲུག </p><p>དེ་ནི་བརྩེ་བ་རྒྱ་མཚོ་ལས་ཟབ་པའི་ལོ་ངོ་དྲུག </p><p>དེ་ནི་ཕྱིར་དྲན་ཡིད་འོང་གི་ཕྱུག་པའི་ལོ་ངོ་དྲུག </p><p>དེ་ནི་རེ་བ་དང་ཕུགས་བསམ་གྱིས་ཕྱུག་པའི་ལོ་ངོ་དྲུག</p> <p>ལོ་ཟླ་ལ་ཕྱིར་ཡོང་མེད་ཀྱང་ཡོད་ན་བསམ། དུས་ཚོད་ཀྱི་ངོས་ནས་ང་ཚོས་བརྩེ་བའི་རིན་དོད་རྙེད། </p><p>སློབ་གྲོགས་ཚོ། འུ་ཚོར་ལམ་གྱིས་ཁ་ཐག་བཅད་ཀྱང་སེམས་ཀྱི་ཁ་ཐག་བཅད་མེད། དེའི་རྐྱེན་གྱིས་ང་ཚོ་ནམ་ཡང་མཉམ་དུ་ཡོད།</p><p>ལོ་ངོ་དྲུག་གི་སློབ་རའི་འཚོ་བ་ནི་དགའ་ཞིང་སྐྱོ་བ་ཡིན་མོད། དུས་འདི་ཙམ་ནས་ཕྱིར་དྲན་དུ་གྱུར་བས། དེ་ནི་ཅི་འདྲའི་སྙིང་དུ་བྲོད་ཨང་། </p><p>སློབ་གྲོགས་ཚོ། འདི་ལྟར་ལམ་ལ་འབུད་དུས། རང་ལམ་རང་གིས་ནོན་དགོས་ལ། མ་འོངས་པ་ན་སོ་སོའི་རྨི་ལམ་དུ་ཉི་ཟླ་ཚེས་པར་ཤོག </p><p>六年就这样一晃而过，这六年里有喜有悲，也有太多的回忆和不舍。</p><p>毕业了，你们毕业了。毕业是一首离歌，但绝不是悲歌。天下没有不散的宴席，我们的分别并不是永别，而是为了以后拥有更好的选择，让我们挥手再见，说一声珍重，道一声祝福，感谢彼此曾经的美好回忆，珍藏彼此真挚的情意。愿你们前程似锦！</p><p>最后祝宝贝们毕业快乐，愿拥有美好的未来。🙏🙏🙏🙏🙏</p><p><br></p>