<p>དུས་རབས་ཀྱི་གོམ་འགྲོས་བར་ནས།། སློབ་ཁྲིད་ལ་གཤོག་ཟུང་འདོགས་དགོས།།</p> <p> ༢༠༢༠ལོའི་ཟླ་ལྔ་བའི་ཚེས་༢༨་ཉིན་གྱི་སྔ་དྲོའི་སློབ་ཐུན་དང་པོ་དང་། ཚེས་༢༩་གཉིས་ཀྱི་སྔ་དྲོའི་སློབ་ཐུན་གཉིས་པ་བེད་སྤྱད་དེ། དགེ་རྒན་གསར་བ་དག་གི་སློབ་ཁྲིད་བྱེད་ཐབས་དང་སློབ་ཁྲིད་སྤུས་ཚད་མཐོར་འདེགས་གཏོང་བ། སློབ་ཐུན་འཆར་འགོད་ལེགས་འགྲུབ་ཡོང་བ་བཅས་ཕྱོགས་གང་ཐད་ནས་ཡར་རྒྱས་ཡོང་བར་སྐུལ་སློང་བྱེད་པར་དམིགས་ཏེ། ངེད་གྲངས་རིག་ཚན་ཆུང་གིས་གསར་ཞུགས་དགེ་རྒན་བཀྲ་ཤིས་འཚོ་དང་ཏིང་འཛིན་འཚོ་གཉིས་ཀྱི་སློབ་ཁྲིད་ལ་ཉན་ཏེ་ཁོ་གཉིས་ཀྱི་གྲངས་རིག་སློབ་ཁྲིད་བྱེད་སྟངས་ཐད་ལ་དཔྱད་འཇོག་བྱེད་པའི་བྱ་འགུལ་སྤེལ་པ་ཡིན།</p><p> དགེ་རྒན་འདི་རྣམ་གཉིས་ཀྱིས་སློབ་ཁྲིད་ལ་གྲ་སྒྲིག་བྱས་པ་ཞིབ་ཚགས་ཡིན་ཞིང་། སློབ་མའི་བློ་དང་འཚམ་པའི་སློབ་ཁྲིད་བྱེད་ཐབས་སྤྱད་ཡོད་པ་མ་ཟད། དཀའ་གཙོ་གནད་འབུར་དུ་ཐོན་ཞིང་། སློབ་ཁྲིད་གོ་རིམ་གསལ་པ་དང་། སློབ་མའི་ཁ་ལག་ཀླད་གསུམ་འགུལ་བའི་གནས་ཚུལ་མིག་གིས་འཚོས་ཏེ། སློབ་མ་རེ་རེ་ཡི་བྱ་བྱེད་རྣམ་འགྱུར་མཐའ་དག་ལ་ལྟ་རྟོག་ནན་མོ་བྱས་པ་དང་། སྨྱན་མང་གཟུགས་ཀྱི་འཆར་འགོད་ལེགས་ཤིང་གྲལ་དག་པ། རི་མོའི་བཀོད་སྒྲིག་ཤིན་ཏུ་ལེགས་པས་སློབ་མའི་སྤྲོ་སེམས་སློང་བའི་ནུས་པ་ལྡན་ཞིང་། སྨྱན་གཟུགས་དང་སམ་བྲིས་ཟུང་འབྲེལ་གྱིས་དགེ་སློབ་གཉིས་ཀྱིས་མཉམ་དུ་རྩིས་བརྒྱབ་པས་སློབ་མའི་རང་འགུལ་གྱི་ནུས་པ་མཐོར་འདེགས་བྱུང་ཞིང་། འཆད་པ་དང་ཁྲིད་སྟོན་ཟུང་འབྲེལ་གྱིས་སློབ་ཐུན་ཧྲིལ་བོ་སྤྲོ་སྣང་གིས་ཁེངས་ཤིང་གསོན་ཤུགས་རྒྱས་པར་བྱས།</p> <p> </p> <p> ཚེས་༢༨ཉིན་གྱི་སྔ་དྲོའི་སློབ་ཐུན་དང་པོར་དགེ་རྒན་ཏིང་འཛིན་འཚོ་ཡིས་<བཅུ་ཕྲག་གྲངས་ལ་བཅུ་ཕྲག་གྲངས་ཀྱི་སྣོན་འཕྲི་>ཞེས་པ་སློབ་ཁྲིད་བྱེད་སྐབས་སུ་སློབ་མ་ཚོར་ཆེས་ཆ་རྒྱུས་ཡོད་པའི་དཔེ་དེབ་ཀྱི་ཁ་གྲངས་བརྩི་བར་ཐབས་ཤེས་སྣ་མང་གིས་ཁྲིད་སྟོན་བྱས་ཏེ། སློབ་མའི་རིགས་ལམ་གྱི་སྒོ་མོ་ཕྱེ་བ་དང་། ཁོ་ཚོའི་བློ་སེམས་སློབ་ཁྲིད་ལ་ཞུགས་པར་ནུས་པ་བླ་ལྷག་ཐོན།སློབ་མ་ཚོས་འགྲན་རྩོད་ཀྱི་སྒོ་ནས་རྩིས་བརྒྱབ་སྟེ་སུ་མགྱོགས་སུ་འགྲིག་དགེ་རྒན་ལ་སྟོན་རེས་བྱས་ཤིང་། སྦྱང་གཞི་ཇུས་འགོད་བྱས་པ་སློབ་མའི་བློ་དང་མཐུན་ལ་ཡིད་འགུག་གི་ཁྱད་ཆོས་ལྡན། སློབ་མ་ཚོས་སྤྲོ་སྣང་དང་མཚར་སྣང་མཉམ་འབྲེལ་གྱིས་རྩིས་བརྒྱབ་ནས་སློབ་ཁྲིད་ཀྱི་དམིགས་ཡུལ་བད་ེབླག་ངང་སྒྲུབ་ཐུབ་པ་བྱུང་།</p> <p> ཚེས་༢༩ཉིན་གྱི་སློབ་ཐུན་གཉིས་པའི་སྟེང་དགེ་རྒན་བཀྲ་ཤིས་འཚོས་<མི་དམངས་སྒོར་མོ་ངོས་འཛིན་>ཞེས་པ་ཁྲིད་སྐབས་སུ་སློབ་མ་ཚོའི་འཚོ་བའི་ཁྲོད་དུས་རྒྱུན་དུ་སྤྱོད་བཞིན་པའི་སྒོར་མོ་བརྗོད་བྱར་བཟུང་སྟེ་སློབ་གྲོགས་ག་གེ་མོས་སྒོར་མོ་ག་ཚོད་བཟུང་ཡོད་པ་དང་། སློབ་མ་རང་ཉིད་དགའ་པའི་སློབ་སྦྱོང་གི་ཡོ་བྱད་གཅིག་ཉོ་བར་སྒོར་མོ་ག་ཚོད་སྤྱད་ཡོད་པའི་སྐོར་གྱི་དྲི་བ་བཏོན་པ་དང་མཉམ་དུ་སློབ་མའི་སྤྲོ་སེམས་འུར་ཆིལ་ལེར་གཅིག་ཏུ་བསྡུས་ཏེ། རང་རང་གི་གནས་ཚུལ་བཤད་ཅི་ཐུབ་བྱས་པ་དང་། སློབ་མ་ཚང་མ་སྒོར་མོའི་སྐོར་གྱི་དྲི་བ་དྲིས་ལན་གྱི་བྱ་འགུལ་དུ་ཞུགས་ཐུབ་པར་བྱས། སློབ་མ་ཚོ་དང་ཆེས་ཐག་ཉེ་བའི་འཚོ་བའི་ཁྲོད་ཀྱི་དཔེར་བརྗོད་དྲངས་པ་དེས་སློབ་མའི་རྣམ་རིག་སློབ་ཁྲིད་ལ་འཐིམས་སུ་བཅུག་པས་སློབ་ཁྲིད་ཀྱི་དམིགས་ཡུལ་དང་འགན་འཁྲི་རང་ཤུགས་ཀྱིས་སྒྲུབ་ཐུབ་པར་གྱུར།</p> <p><br></p><p><br></p><p> ཕྱི་དྲོར། སློབ་ཁྲིད་བྱེད་མཁན་དགེ་རྒན་གཉིས་ཀྱིས་རང་སོ་སོའི་སློབ་ཁྲིད་བྱེད་ཐབས་དང་སློབ་ཁྲིད་བྱས་རྗེས་ཀྱི་མྱོང་ཚོར་གསལ་བཤད་བྱས་པ་དང་། དེ་ནས་སློབ་གཙོ་གཞོན་པ་གཙོ་བྱས་ཏེ་གྲངས་རིག་ཚན་ཆུང་གི་དགེ་རྒན་ཡོངས་ཀྱིས་སྔ་དྲོའི་སློབ་ཁྲིད་ལ་ཉན་རྗེས་ཀྱི་བསམ་ཚུལ་དང་སློབ་ཁྲིད་ཁྲོད་ཀྱི་གནད་དོན། མི་འདང་ས། མཉམ་འཇོག་བྱ་དགོས་པའི་གནད་གཙོ་བོ་གང་ཡིན་པ་དང་། དགེ་སློབ་ཟུང་འབྲེལ་བྱེད་ཐབས་ཀྱི་ཉམས་མྱོང་སོགས་བཤད་དེ། དེང་ཕྱིན་གྱི་སློབ་ཁྲིད་བྱ་བའི་ཁྲོད་གཞོན་སྐྱེས་དགེ་རྒན་དག་གི་སློབ་ཁྲིད་བྱེད་ནུས་མཐོར་འདེགས་གཏོང་བར་རྨང་གཞི་འཇོག་པར་ཕན་ནུས་ཐོན་པའི་དཔྱད་བརྗོད་བྱས།</p><p><br></p> <p><br></p><p> མཇུག་མཐར། སློབ་གཙོ་གཞོན་པ་རིན་ཆེན་རྡོ་རྗེ་ཡིས་སློབ་ཁྲིད་བྱེད་མཁན་དགེ་རྒན་གཉིས་ལ་གདེང་འཇོག་ཚད་མཐོན་པོ་གནང་བ་དང་། སློབ་ཁྲིད་བཟང་པོ་ཞིག་བྱེད་པར་ངེས་པར་དུ་སློབ་ཁྲིད་གྲ་སྒྲིག་ནན་མོ་ཞིག་བྱ་རྒྱུ་གལ་ཆེ་བ་དང་། སློབ་ཁྲིད་ལེགས་པོ་འཁྱོངས་མིན་དེ་ཡང་སློབ་ཁྲིད་གྲ་སྒྲིག་སྐབས་ཀྱི་འཆར་འགོད་ཞིབ་ཚགས་ཡིན་མིན་དང་འབྲེལ་བ་དམ་པོ་ཡོད་ཚུལ་སོགས་སློབ་ཁྲིད་ཀྱི་གལ་ཆེན་རང་བཞིན་ནན་བརྗོད་བྱས་པ་མ་ཟད། སློབ་ཁྲིད་བྱེད་ཐབས་ཐད་ནས་རེ་འདུན་གང་མང་བཏོན་བྱུང་།</p> <p> ཐེངས་འདིའི་བྱ་འགུལ་བརྒྱུད་ནས། གྲངས་རིག་དགེ་རྒན་རྣམས་ཀྱིས་རང་རང་གི་སློབ་ཁྲིད་ཀྱི་ཉམས་མྱོང་ལ་བརྟེན་ནས་དེང་རབས་སློབ་ཁྲིད་ལ་ཚང་དགོས་པའི་གོ་རིམ་དང་། གནད་འགག་གང་ཡོད་པ་གསལ་བཤད་བྱས་པ་མ་ཟད། སྨྱན་མང་གཟུགས་ཀྱི་བཟོ་བཀོད་དང་སློབ་ཁྲིད་འཆར་འགོད་ལེགས་འགྲུབ་ཡོང་ཐབས། སློབ་མའི་བློ་སྣ་སློབ་ཁྲིད་ལ་ཕྱོགས་སུ་འཇུག་དགོས་པའི་གལ་ཆེན་རང་བཞིན། དགེ་སློབ་ཟུང་འབྲེལ་གྱིས་སློབ་ཁྲིད་ལ་ཐོན་དགོས་པའི་བྱེད་ནུས། སྦྱང་གཞི་ཇུས་འགོད་བྱེད་ཐབས་བཅས་ཀྱི་ཐད་ནས་དཔྱད་་བརྗོད་གནད་དུ་འཁེལ་བ་གནང་བྱུང་།</p>