<p>ས་གཡང་ཆགས་གསེར་མོ་ལྗོངས་ཀྱི།</p><p>ཆོས་དུང་སྒྲ་ལྷང་ལྷང་གྲགས་པས།</p><p>སྒར་ཁྲ་ཁྲ་དུང་དཀར་འདྲ་བོ།</p><p>ས་རེབ་གོང་གཡེར་གཤོང་དགོན་རེད།</p><p>མ་སེམས་ཅན་སྡུག་བསྔལ་སེལ་མཁན།</p><p>རྗེ་འཇམ་དབྱངས་བསྟན་འཛིན་རྒྱ་མཚོ།</p><p>སྐུ་ཐེངས་གཅིག་མཇལ་ན་སྡུག་དག་གི།</p><p>གསུང་ལན་གཅིག་ཐོས་ན་ཡིད་དགའ་གི།</p><p>རྗེ་བླ་མ་གཙུག་གི་ནོར་བུ་ཁྱེད།</p><p>མ་འགྲོ་དྲུག་འདྲེན་པའི་སྐྱབས་མགོན་རེད།</p><p>ཨེ་མ། བསྐལ་བ་བཟང་པོ།</p><p>དར་དཀར་པོའི་ལྷ་དར་ཁྱེད་ལ་འབུལ།</p><p><br></p><p>ས་གཡང་ཆགས་གསེར་མོ་ལྗོངས་ཀྱི།</p><p>ཆོས་མེ་ཏོག་ཆར་བཞིན་འབབ་པས།</p><p>སྒར་ཁྲ་ཁྲ་མུ་ཏིག་འདྲ་བོ།</p><p>དགོན་གཡེར་གཤོང་བསམ་གཏན་གླིང་རེད།</p><p>ཆོས་ཡོན་ཏན་ཀུན་གྱིས་ཕྱུག་པས།</p><p>རྗེ་འཇམ་དབྱངས་བསྟན་འཛིན་རྒྱ་མཚོ།</p><p>སྐུ་ཐེངས་གཅིག་མཇལ་ན་སྡུག་དག་གི།</p><p>གསུང་ལན་གཅིག་ཐོས་ན་སེམས་སྐྱིད་གི།</p><p>རྗེ་བླ་མ་གཙུག་གི་ནོར་བུ་ཁྱེད།</p><p>མོ་ཉམས་ཆུང་སྐྱོང་བའི་སྐྱབས་མགོན་ཡིན།</p><p>ཨེ་མ། བསྐལ་བ་བཟང་པོ།</p><p>ངག་གླུ་ཆུང་མཆོད་པ་ཁྱེད་ལ་འབུལ།</p><p><br></p><p> པར་ཁུངས།མཆོད་རྟེན།</p>