<p><br></p> <p>༄༅།། རྫོང་ཡོངས་ཀྱི་ཁྱིམ་བདག་རྣམས་ལ་ཕུལ་བའི་འཕྲིན།</p><p> མཛའ་ཞིང་བརྩེ་བའི་ཁྱིམ་བདག་རྣམ་པ་ཚང་མ་སྐུ་ཁམས་བཟང་།</p><p><br></p><p> སྤྱིར་སློབ་མ་ཞིག་ལ་མཚོན་ན་མི་ཚེ་ཡི་རྒྱུད་རིམ་ཁྲོད་དུ་ངེས་པར་དུ་སློབ་གསོ་རིམ་པ་གསུམ་བརྒྱུད་དགོས་པ་སྟེ་ཁྱིམ་ཚང་གི་སློབ་གསོ་དང་སློབ་གྲྭའི་སློབ་གསོ། སྤྱི་ཚོགས་ཀྱི་སློབ་གསོ་བཅས་ཡིན།འདི་གསུམ་ལས་མི་གཤིས་ཀྱི་སློབ་གསོའམ་རྨང་གཞིའི་སློབ་གསོ་ནི་ཁྱིམ་ཚང་གི་སློབ་གསོ་དེ་ཡིན། བྱིས་དུས་ཀྱི་རིག་པ་ནི་རྣམ་པར་བཀྲ་བཞིན་པའི་མེ་ཏོག་ཆུང་ཆུང་ཞིག་དང་འདྲ་སྟེ་ང་ཚོ་ཕ་མ་རྣམས་ཀྱིས་ཆུང་ནས་ཁོང་ཚོར་ཡ་རབས་སྤྱོད་བཟང་གི་མིག་དཔེ་བཟང་པོ་ཞིག་དང་མི་གཞི་ཀུན་སྤྱོད་ཀྱི་སློབ་གསོའི་ཆུ་ལུད་བཟང་པོ་ཞིག་གཏོང་རྒྱུ་ནི་ཤིན་ཏུ་གལ་ཆེ་བ་ཡིན།</p><p>ཁྱད་པར་དུ་ཁྱིམ་བདག་རྣམ་པར་ཆེད་དུ་ཞུ་འདོད་པ་ཞིག་དང་མ་ཞུས་ཐབས་མེད་ཀྱི་གནད་དོན་ཞིག་ནི་ཚང་མས་མཁྱེན་གསལ་ལྟར་དུ་རྒྱལ་ཁབ་དང་མི་རིགས་གང་ཞིག་ཡིན་ཡང་དེའི་སྲོག་རྩ་ལྟ་བུ་ནི་རང་རང་གི་སྐད་དང་ཡི་གེ་རེད། ཡི་གེ་ནི་ཡོན་ཏན་ཀུན་གྱི་གཞི་མ་ཡིན་པ་སྟེ་སྤྱི་སྒེར་གང་ཞིག་ཡིན་ཡང་ཆུང་ས་ནས་ཤེས་རིག་དང་ནུས་པ། འཇོན་ཐང་། ཆེ་ས་ནས་ཆབ་དཔལ་རིག་གསུམ་གང་ཞིག་གོང་དུ་སྤེལ་བར་མེད་ཐབས་མེད་པ་ནི་སྐད་དང་ཡི་གེ་ཡིན་ལ་སྐད་ཡིག་གཉིས་པོ་ལ་བསྟེན་ནས་ང་ཚོས་་རིག་གཞུང་གི་མཚོ་ཆེན་དེ་བརྒལ་དགོས།</p><p>དེས་ན་འཕེལ་རྒྱས་ཀྱི་རྟ་ཕོ་ནི་རླུང་ལྟར་མགྱོགས་ཤིང་ཚན་རྩལ་གྱི་རིག་པ་ལྷག་ཏུ་བྲིན་པའི་ད་ལྟའི་དུས་རབས་འདིར་སློབ་གསོའི་ལས་དོན་ཡང་སྔར་ལས་ལྷག་པར་འཕེལ་རྒྱས་སུ་འགྲོ་བཞིན་པ་དང་ཏང་དང་རྒྱལ་ཁབ་ཀྱི་འཆར་འགོད་དང་བློ་མཐུན་ཤེས་ཅིང་ཕན་གྱི་ཐོག་མའི་བསམ་འདུན་མི་བརྗེད་པར་འགན་འཁྲི་ཡིད་ལ་བརྟན་པོར་བཅངས་ཞེས་པའི་བརྗོད་གཞིའི་དགོངས་དོན་དང་རྒྱལ་ཁབ་སློབ་གསོ་པུ་ཡིས་འབྲིང་རྒྱུགས་དང་མཐོ་རྒྱུགས་བཅོས་བསྒྱུར་བྱས་པ་ནས་བཟུང་སློབ་གྲྭ་ཆེ་འབྲིང་ཆུང་གསུམ་གྱིས་དཔེ་ཀློག་གི་བྱ་བར་ཤུགས་སྣོན་དང་དཔེ་ཀློག་ནི་སློབ་མའི་སློབ་སྦྱོང་གི་འཚོ་བར་མེད་དུ་མི་རུང་བའི་གྲུབ་ཆ་ཞིག་ཏུ་གྱུར་ཡོད་ལ་སློབ་མ་སོ་སོའི་མི་ཚེའི་རྒྱུད་རིམ་ཁྲོད་ལུས་སེམས་བདེ་སྐྱིད་དུ་བསྐྱོད་པའི་ལམ་བུ་གལ་ཆེན་ཞིག་ཀྱང་ཡིན། དེ་ལས་གལ་ཆེ་བར་ཞུས་ན་འབྲིང་རྒྱུགས་དང་མཐོ་རྒྱུགས་གི་རྒྱུགས་གཞིའི་ནང་དོན་ལས་དཔེ་ཀློག་གིས་རྒྱུགས་གཞི་སྤྱི་ཡི་སྐར་གྲངས་ཀྱི་ཚད་མཐོན་པོ་ཞིག་ཟིན་ཡོད་པས་དཔེ་ཀློག་ལ་མོས་པ་མེད་པའི་སློབ་མ། དཔེ་ཀློག་ལ་རྒྱབ་སྐྱོར་མེད་པའི་ཁྱིམ་བདག། དཔེ་ཀློག་ལ་དམ་འཛིན་མེད་པའི་སློབ་གྲྭ་ཞིག་ཆགས་པར་གྱུར་ན་མི་རིགས་དང་ས་གནས་ཀྱི་སློབ་གསོ་གོང་འཕེལ་དུ་མི་འགྲོ་བ་མ་ཟད་སློབ་མ་སོ་སོའི་མི་ཚེ་ཡི་ལམ་སྐྱོག་འདི་ནས་རྒྱུགས་འབྲས་བཟང་པོ་ཞིག་ལོན་པའི་རེ་བ་བྲལ་ཚར་བ་ཡིན། རྒྱུ་མཚན་དེ་ཡི་ཕྱིར་ན་ང་ཚོའི་རྒྱལ་ཁབ་དང་མི་རིགས་འདི་ལ་ལོ་རྒྱུས་རིང་ཞིང་འཛམ་གླིང་གི་སྔོན་ཐོན་ཡིག་རིགས་ཀྱི་གྲལ་དུ་ཚུད་པའི་ཡི་གེ་ཕུན་གསུམ་ཚོགས་པ་ཞིག་དང་རྒྱལ་སྤྱིའི་སྟེང་ནས་ངོམ་རིན་ཡོད་པའི་རིག་གནས་ཕུན་གསུམ་ཚོགས་པ་ཞིག་ཡོད་པ་འདི་དག་སྔར་བྱོན་གྱི་མཁས་དབང་དམ་པ་རྣམས་ཀྱི་བློ་གྲོས་ཀྱི་རྩལ་ལས་བྱུང་བ་ཡིན་པས་ང་ཚོས་ཁོང་རྣམ་པའི་གསུང་རབས་བཀླག་རྒྱུ་ནི་རང་ཉིད་མི་ལུས་ཚད་ལྡན་དུ་འགྲོ་བ་དང་སྤྱི་ཚོགས་འཆམ་མཐུན་ཡོང་བ་མིའི་བསམ་སྤྱོད་ཇེ་ལེགས་སུ་འགྲོ་བ་། རྒྱལ་ཁབ་དང་མི་རིགས་གོང་འཕེལ་དུ་འགྲོ་བའི་རྒྱུ་ཅིག་པུ་དེ་ཡིན་པས་རྫོང་ཡོངས་ཀྱི་ཁྱིམ་བདག་དང་སློབ་གྲྭ། སློབ་མ་ཀུན་གྱིས་འདུན་པ་དང་བརྩོན་པ་དཔེ་ཀློག་ལ་ཕྱོགས་ནས་གཡུར་དུ་ཟ་བའི་འབྲས་བཟང་ཞིག་ལེན་པར་རེ་བའི་འབོད་སྐུལ་ཞུ་ཞུ་ཞུ་ཞུ། </p><p><br></p><p>ཞེས་ནང་ཆེན་རྫོང་མི་རིགས་སླབ་འབྲིང་དང་པོའི་དགེ་སློབ་ཡོངས་ནས་སྤྱི་ལོ་༢༠༢༠་ལོའི་ཟླ་༤་པའི་ཚེས་༡༧ ་ཉིན་ཕུལ།</p> <p>ཡོན་ཏན་མེད་པའི་ཁ་ཉིད་ནི། །</p><p>ས་ཡི་བུ་ག་དག་དང་མཚུངས། །</p><p>ཡོན་ཏན་རབ་ཀྱི་བརྒྱན་པ་ཡི། །</p><p>ཁ་ནི་པད་མོ་ཡིད་འོང་ལྡན། །</p><p> འཕགས་པ་ཀླུ་སྒྲུབ།</p><p><br></p><p><br></p> <p> ཡོན་ཏན་ཀུན་གྱི་གཞི་མ་ནི།།</p><p> འབྲི་ཀློག་གཉིས་ལ་ཆུབ་པར་སྦྱངས།།</p><p> བཀོད་ལེགས་མཆོད་པའི་དངོས་གང་དག།</p><p> བཀོད་གཞི་ལེགས་ན་ལྷག་པར་མཛེས།།</p><p> གྲུབ་རིགས་ཁྱུ་མཆོག</p> <p><br></p>