<p><b style="font-size: 15px;">ཚིག་གི་རྒྱ་མཚོ།</b></p><p><br></p><p style="text-align: center;"><span style="font-size: 15px;">སེང་རྡོར་ལ་ཕུལ་བ།</span></p><p><br></p><p><span style="font-size: 15px;">ཁྱོད་ཀྱི་སྙན་ངག་པི་ཝང་ཨེ་རེད་པི་ཝང་བཞིན་དུ་སྙན་འདུག་གོ།</span></p><p><span style="font-size: 15px;">ཁྱོད་ཀྱི་སྙན་ངག་མེ་ཏོག་ཨེ་རེད་མེ་ཏོག་བཞིན་དུ་མཛེས་སྡུག་ལྡན།།</span></p><p><span style="font-size: 15px;">ཁྱོད་ཀྱི་སྙན་ངག་གངས་རི་ཨེ་རེད་གངས་རི་བཞིན་དུ་མཐོ་ཞིང་བརྗིད།།</span></p><p><span style="font-size: 15px;">ཁྱོད་ཀྱི་སྙན་ངག་གཙང་བོ་ཨེ་རེད་གཙང་བོ་བཞིན་དུ་དྭངས་ཤིང་གཙང་།།</span></p><p><span style="font-size: 15px;">ཁྱོད་ཀྱི་སྙན་ངག་རྒྱ་མཚོ་ཨེ་རེད་རྒྱ་མཚོ་བཞིན་དུ་གཏིང་མཐའ་ཟབ།།</span></p><p><span style="font-size: 15px;">ཁྱོད་ཀྱི་སྙན་ངག་རྒུན་ཆང་ཨེ་རེད་བཏུང་ན་བརྗོད་འདས་བྲོ་བ་མངའ།།</span></p><p><span style="font-size: 15px;">ཁྱོད་ཀྱི་སྙན་ངག་དཔྱིད་ལྗོངས་ཨེ་རེད་མཐོང་ན་དགའ་ཞིང་མྱང་ན་སྤྲོ།།</span></p><p><span style="font-size: 15px;">ཁྱོད་ཀྱི་སྙན་ངག་ཨ་རག་ཨེ་རེད་ཁ་ལ་སྐྱུར་ཞིང་ཁོག་ལ་ཞིམ།།</span></p><p><span style="font-size: 15px;">ཁྱོད་ཀྱི་སྙན་ངག་སྦྲང་རྩིའི་སྒྲ་དང་ཚངས་པའི་དབྱངས་ཀྱི་ཟླ་བོ་རེད།།</span></p><p><span style="font-size: 15px;">ཁྱོད་ཀྱི་སྙན་ངག་ཀ་ལ་པིང་ཀ་དང་ནི་གོང་མོའི་མགྲིན་དབྱངས་རེད།།</span></p><p><span style="font-size: 15px;">ཁྱོད་ཀྱི་སྙན་ངག་སྦྲང་རྩི་དང་ནི་ཞིམ་མངར་བུ་རམ་ཀ་ར་རེད།།</span></p><p><span style="font-size: 15px;">ངོ་མ་བཤད་ན་ང་ནི་ཁྱོད་ཀྱི་སྙན་ངག་འཚོལ་བའི་མི་ཕོ་སྟེ།།</span></p><p><span style="font-size: 15px;">ཉིན་མཚན་མེད་པར་དེ་ལ་གཡེང་ཞིང་དེ་ལ་འཁོར་བ་ཡུན་རིང་སོང་།།</span></p><p><span style="font-size: 15px;">བདག་གི་མི་ཚེའི་འཕྲེང་ཐག་མ་ཆད་བར་དུ་ཁྱོད་ཀྱིས་སྙན་ངག་དག །</span></p><p><span style="font-size: 15px;">གཅིག་ཀྱང་མ་ལུས་ཀློག་པའི་འདུན་པ་རི་བོ་ལས་ཀྱང་ལྕི་ནས་འདུག །</span></p><p><span style="font-size: 15px;">དོ་ཞག་བདག་གིས་"ཆམ་པ"་དང་ནི་"ཚོན་མ་བཏང་བའི་སྙན་ངག"་གམ།།</span></p><p><span style="font-size: 15px;">"བོད་སྐད་གཏིང་"སོགས་རེ་རེ་བཞིན་དུ་ཁོམ་སྐབས་དང་བསྟུན་བཀླགས་པ་ཡིས།། </span></p><p><span style="font-size: 15px;">སྨྲ་བསམ་བརྗོད་འདས་ཚོར་བ་སྐྱེན་པོ་མདུན་ན་རྩེན་ཞིང་སྤང་ན་དགོད།།</span></p><p><span style="font-size: 15px;">ཡིད་འགྱུར་ཚིག་གི་མེ་ཏོག་དག་གིས་ཞབས་བྲོ་འཁྲབ་ཞིང་གླུ་དབྱངས་ལེན།།</span></p><p><span style="font-size: 15px;">རྩོམ་ཡིག་རེ་རེ་བགྲང་བ་མི་ནུས་བགྲང་ན་ཉིན་མ་སྟོང་ཟད་རེད།།</span></p><p><span style="font-size: 15px;">ཁྱོད་ཀྱིས་ཀློག་དང་ཁྱོད་ཀྱི་ཚོར་ངེས་ཚིག་གསལ་གོ་བ་བདེ་མོ་ཡོད།།</span></p><p><span style="font-size: 15px;">ཁྱོད་ཀྱི་མྱོང་དང་ཁྱོད་ཀྱི་ཤེས་ངེས་དྲིན་ཆེན་ཕ་མ་དཔེ་ལ་འཇོག།</span></p><p><br></p><p style="text-align: center;"><span style="font-size: 15px;">2020/3/18/ བཟི་ཁ། ལྷ་ཐོག</span></p><p style="text-align: center;"><br></p><p style="text-align: center;"><br></p><p style="text-align: center;"><br></p><p><b style="font-size: 15px;">དྲན་པའི་ལེའུ།</b></p><p><br></p><p style="text-align: center;"><span style="font-size: 15px;">བཟི་ཁ། ལྷ་ཐོག</span></p><p><br></p><p><span style="font-size: 15px;">ཉི་མ་ནུབ་རོལ་བརྒལ་བའི་ས་སྲོད་ཞིག་ལ།།</span></p><p><span style="font-size: 15px;">སྤྲིན་པའི་འཐབ་ར་ཁྲོད་ཀྱི་ཡིད་ཀྱི་ལྷ་ཚོགས།།</span></p><p><span style="font-size: 15px;">དྲན་པའི་བདག་གི་སེམས་ཀྱི་སྒོ་མོ་བརྡུངས་དུས།།</span></p><p><span style="font-size: 15px;">སྐྱོ་བའི་མིག་ཆུ་མི་ལྷུང་རང་དབང་ཅི་ཡོད།།</span></p><p><br></p><p><span style="font-size: 15px;">ཧ་ཅང་སྐྱོ་བའི་སེམས་ལ་སྐྱོ་བ་ཁུར་ཏེ།།</span></p><p><span style="font-size: 15px;">ཁེར་རྐྱང་མུན་པའི་ཁྲོད་ནས་ཕྱི་དྲན་བྱས་ན།།</span></p><p><span style="font-size: 15px;">བདུན་བདུན་དུས་ཚིགས་འདི་ལ་དྲན་པའི་མི་དེ།།</span></p><p><span style="font-size: 15px;">ཉི་ཟླ་རལ་བ་ཁུར་བའི་འབྲོང་ཁྱུ་ཡིན་རེད།</span></p><p><br></p><p><span style="font-size: 15px;">ང་ཡིས་ཁྱོད་ཉིད་དྲན་ཞིང་ཁྱོད་ཉིད་གླེང་ན།།</span></p><p><span style="font-size: 15px;">ལས་དབང་གནམ་གྱི་རྒྱ་མོའི་བཀའ་ཆད་རག་འོང་།།</span></p><p><span style="font-size: 15px;">འོན་ཏང་ཁོ་བོའི་ཁོག་ལ་སྙིང་ཞིག་ཡོད་པས།།</span></p><p><span style="font-size: 15px;">གསུམ་པའི་བདུན་བདུན་འདི་ལ་མི་སྐྱོ་སྲིད་དམ།།</span></p><p><br></p><p><span style="font-size: 15px;">ཁྱོད་ནི་བདག་གི་སེམས་ཀྱི་ཟབ་ས་ཤིག་ཏུ།།</span></p><p><span style="font-size: 15px;">ལྷུང་ལྷུང་དལ་གྱི་འབབ་པའི་གཙང་བོ་ཡིན་ནོ།།</span></p><p><span style="font-size: 15px;">ཆུ་མགོ་གངས་ནས་བརྩམས་པའི་ལོ་རྒྱུས་ཁྲོད་ནས།། </span></p><p><span style="font-size: 15px;">གོ་ལ་ཕྱག་ཏུ་བསྣབས་པའི་སྐྱེས་ཆེན་འཁྲུངས་མྱོང་།།</span></p><p><br></p><p><span style="font-size: 15px;">ང་ནི་ཁྱོད་ལ་དགའ་ཞིང་ཁྱོད་ལ་དུངས་བས།། </span></p><p><span style="font-size: 15px;">ཉི་ཟླའི་འགྲུལ་བཞུད་ཁྲོད་ནས་བརྗེད་པ་སྲིད་དམ།།</span></p><p><span style="font-size: 15px;">ཡང་སྙིང་ཁྱོད་ཉིད་བཤེགས་པའི་དུས་ཚིགས་འདི་ལ།།</span></p><p><span style="font-size: 15px;">ལྷག་ཏུ་ཁྱོད་ཉིད་དྲན་ཞིང་ཁྱོད་ཉིད་གླེང་འདོད།།</span></p><p><br></p><p><span style="font-size: 15px;">གསེར་མདོག་ཉི་མ་རྒྱང་ནས་རྒྱང་དུ་བཞུད་དུས།།</span></p><p><span style="font-size: 15px;">ངས་སེམས་གདུང་བས་མནར་ཏེ་མུན་པ་རུབ་སོང་།།</span></p><p><span style="font-size: 15px;">སྐྱོ་གདུང་སེམས་ཀྱི་ན་ཚ་བཤད་ཐབས་ཕོད་མེད་ཀྱང་།།</span></p><p><span style="font-size: 15px;">བྲང་ཁོག་དོག་མོའི་ནང་ནས་ཐོར་གྲབས་བྱེད་ཀི །</span></p><p><br></p><p style="text-align: center;"><span style="font-size: 15px;">2020/3/14/</span></p><p style="text-align: center;"><br></p><p style="text-align: center;"><br></p><p><b>མཚོ་ལ་ཕུལ་བའི་གླུ།</b></p><p style="text-align: center;"><span style="font-size: 15px;">བཟི་ཁ། ལྷ་ཐོག</span></p><p><br></p><p><span style="font-size: 15px;">དོ་ནུབ་ང་ཡིས་ཁྱོད་ཉིད་དྲན་བྱུང་ངོ་།།</span></p><p><span style="font-size: 15px;">དྲན་པ་སྐྱ་བོ་འགོག་ཐབས་ཨེ་ཡོད་ཨང་།།</span></p><p><span style="font-size: 15px;">མེད་ན་སེམས་ཀྱི་ན་ཟུག་སྤར་བ་གང་།།</span></p><p><span style="font-size: 15px;">ང་ལ་བཙན་གྱིས་སྤྲད་པ་ཅི་ཞིག་རེད།།</span></p><p><br></p><p><span style="font-size: 15px;">ནམ་ཟླ་འདི་ལ་མུན་པ་གང་ཙམ་རུབ།། </span></p><p><span style="font-size: 15px;">མུན་པའི་ཁྲོད་ནས་ང་རང་གང་ཙམ་སྐྱོ།།</span></p><p><span style="font-size: 15px;">སྐྱོ་བའི་སེམས་ལ་དྲན་གདུང་བླུགས་ཙ་ན།། </span></p><p><span style="font-size: 15px;">མ་ཤི་དམྱལ་བ་འགྲིམས་པའི་ཚོར་བ་བྱུང་།།</span></p><p><br></p><p><span style="font-size: 15px;">དབེན་ཁྲོད་འདི་ནི་མྱ་ངན་ཐང་ཞིག་རེད།།</span></p><p><span style="font-size: 15px;">སྡུག་གི་མུན་པ་རུབ་པའི་གནས་ཤིག་རེད།།</span></p><p><span style="font-size: 15px;">ང་ལ་དགོས་པའི་འཚོ་བའི་མེ་ཏོག་ཉིད།།</span></p><p><span style="font-size: 15px;">སྐམ་ནས་ལོ་བརྒྱ་འགོར་བ་ཨེ་ཡིན་ནམ།།</span></p><p><br></p><p><span style="font-size: 15px;">ང་ཡིས་སེམས་ཀྱི་དྲན་པ་གུ་ཡངས་རེད།། </span></p><p><span style="font-size: 15px;">གུ་ཡངས་ཁྱོད་ནས་དྲན་པ་ཆུང་འདྲིས་རེད།།</span></p><p><span style="font-size: 15px;">བྲལ་བའི་སྐྱོ་གདུང་སེམས་ལ་བརྣངས་པ་ན།།</span></p><p><span style="font-size: 15px;">སེམས་ཀྱི་རྨ་ཁར་ལན་ཚྭ་འདེབས་དང་མཚུངས།།</span></p><p><br></p><p><span style="font-size: 15px;">འཛོམས་པའི་མཐའ་མ་བྲལ་བ་ཆོས་ཉིད་རེད།།</span></p><p><span style="font-size: 15px;">ཆོས་ཉིད་ཡིན་ནའང་ཞེན་ཆགས་ཆེ་ཙམ་བྱུང་།།</span></p><p><span style="font-size: 15px;">ལས་ཀྱི་རི་མོ་འཁོར་བའི་ཐང་ལ་བྲིས།།</span></p><p><span style="font-size: 15px;">ཤི་ནའང་རྣམ་ཤེས་དེ་ལ་འཁོར་འཁོར་རེད།།</span></p><p><br></p><p><span style="font-size: 15px;">ངས་ནི་ཁྱོད་ལ་སྡུག་པོ་སྟངས་འདོད་མེད།།</span></p><p><span style="font-size: 15px;">མེད་ཀྱང་ཁྱོད་ལ་རོགས་དན་མི་ཐུབ་སྟེ།།</span></p><p><span style="font-size: 15px;">འུ་གཉིས་བར་ཐག་རིང་རྒྱུ་མེད་ནའང་།།</span></p><p><span style="font-size: 15px;">བརྩེ་བའི་མོལ་མཆིད་ཡལ་ནས་ལོ་གསུམ་འགོར།།</span></p><p><br></p><p><span style="font-size: 15px;">འདས་པའི་ལོ་ཟླ་ཆུ་བོ་བཞིན་བཞུད་དང་།།</span></p><p><span style="font-size: 15px;">ད་ནི་བསྐྱར་དུ་ལོག་ཐབས་ག་ལ་ཡོད།།</span></p><p><span style="font-size: 15px;">མེད་ཀྱང་དྲན་པའི་ཀློང་དུ་འཆར་བ་འདིས།།</span></p><p><span style="font-size: 15px;">བྱིས་དུས་དང་ནི་ཆུང་འདྲིས་དྲན་པ་བྱས།།</span></p><p><br></p><p><span style="font-size: 15px;">དོ་ཞག་ང་རང་ཤིན་ཏུ་སྐྱོ་བའི་ངང་།།</span></p><p><span style="font-size: 15px;">རང་ཤག་ནང་དུ་མྱ་ངན་གསོག་ནས་བསྡད།།</span></p><p><span style="font-size: 15px;">དེ་ཡང་ཁྱོད་ཉིད་དྲན་པས་མ་ལགས་ཏེ།།</span></p><p><span style="font-size: 15px;">འཚོ་བའི་ཁྲོད་ཀྱི་སེམས་ཚེགས་ཡིན་པ་འདྲ།།</span></p><p><br></p><p><span style="font-size: 15px;">དགུང་གི་ཟླ་བ་སྤྲིན་པའི་བསྒྲིབས་ནས་ནི།།</span></p><p><span style="font-size: 15px;">མཚོ་མོའི་མཛེས་སྡུག་གཙང་བོ་ཆུ་ལ་སྦྱིན།།</span></p><p><span style="font-size: 15px;">ཉི་མ་བྲལ་རྗེས་པད་མ་ཟུམ་པ་དང་། །</span></p><p><span style="font-size: 15px;">ཟླ་བ་ཡལ་རྗེས་ཀུ་མུད་འཁུམ་འདྲ་རེད།།</span></p><p><br></p><p style="text-align: center;"><span style="font-size: 15px;">2020/3/16</span></p>