<p>༄༅༎གོང་རིམ་སྡེ་ཁག་གི་ཡང་དག་པའི་སྣེ་སྟོན་དང་ལྷག་པར་དུ་རྨ་ཆུ་རྫོང་སློབ་གསོ་ཚན་རྩལ་ཅུའུ་ཡི་མཛུབ་སྟོན་འོག་ཏུ་2020ལོའི་ཟླ་3པའི་ཚེས9ཉིན་ནས་བཟུང་སྟེ་རྨ་ཆུ་རྫོང་མུར་བྱེག་ཞང་ཞག་སྡོད་སློབ་གྲྭའི་འགོ་ཁྲིད་ཚན་ཆུང་གིས་སྣ་དྲངས་ཏེ།རིམས་འགོག་གི་སྐབས་འདིར་ས་ཆ་གཞན་དུ་སོང་མྱོང་མེད་པ་དང་འབྲེལ་ཡོད་སྡེ་ཁག་གི་ལུས་ཕུང་བདེ་ཐང་གི་བདེན་དཔང་ཡོད་པའི་དགེ་རྒན་དག་བསྡུས་ཏེ་སློབ་འགོ་མ་ཚུགས་གོང་གི་བྱ་བ་མང་པོ་ཞིག་ལ་གྲ་སྒྲིག་དང་བདེ་འཇགས་ཐད་ཀྱི་གནད་དོན་མང་དག་ཅིག་ལ་དག་ཐེར་དང་བསྒྱུར་བཅོས་བྱས་པ་གཤམ་གསལ་ལྟར།</p> <p>གཅིག གོང་རིམ་གྱི་ཡིག་ཆ་དང་ཚོགས་འདུའི་ནང་དོན་བརྒྱུད་སྒྲོག་དང་སློབ་མགོ་མ་ཚུགས་གོང་གི་བྱ་བར་བཀོད་སྒྲིག་རབས་དང་རིམ་པ་བྱས་པ།</p> <p>གཉིས། སློབ་གྲྭའི་ཕྱི་ནང་བར་གསུམ་ལ་ཞིབ་བཤེར་ནན་ཏན་བྱས་ཏེ་གནད་དོན་ཡོད་ཚད་རེ་རེ་བཞིན་ཐོ་འགོད་བྱས་པ།</p> <p>གསུམ། སློབ་གྲྭའི་འཐུང་ཆུ་དང་གློག་གི་གནད་དོན་ལ་ཐབས་བརྒྱ་ཇུས་སྟོང་གིས་བྱེད་ཐབས་སྣ་མང་འཐེན་ཏེ་སློབ་ཁྲིད་སློབ་གསོ་རྒྱུན་ལྡན་ཅན་དུ་ཡོང་བར་རྨང་གཞིའི་ཆ་རྐྱེན་བསྐྲུན་པ།</p> <p>བཞི། སློབ་གྲྭའི་རྒྱ་སྒོ་རུ་ལས་རེས་ཁང་དང་ཚ་གྲང་དཔྱད་ཆས།དུག་སེལ་ཡོ་ཆས་སོགས་བཀོད་སྒྲིག་བྱས་སྟེ་སློབ་གྲྭས་ཀྱང་རྒྱལ་ཁབ་ཀྱི་རིམས་འགོག་བྱ་བར་ཕྱར་བ་གྲུ་འདེགས་བྱས་ཤིང་ཕྱི་མི་ནང་དུ་ཡོང་རྒྱུ་དང་ནང་མི་ཕྱིར་འབུད་པའི་སྐོར་ལ་ཐོ་འགོད་ནན་ཏན་བྱེད་པའི་བླང་བྱ་བཏོན་པ།</p> <p>ལྔ།སློབ་མའི་ཉལ་ཁང་དང་སློབ་ཁང་།ཇ་ཁང་།སྤྱོད་ཁང་།བྱེད་སྒོ་ཁང་།གཞུང་སྒྲུབ་ཁང་སོགས་གཙོ་བྱས་པའི་སློབ་གྲྭའི་ར་སྐོར་ཕྱི་ནང་ཀུན་ལ་གད་དར་བྱས་ཏེ།སློབ་གྲྭ་འཚོགས་སྐབས་སློབ་མ་ཚོར་དག་གཙང་ཡང་གཙང་གི་ཁོར་ཡུག་ཅིག་ཡོང་བར་མཐུན་རྐྱེན་སྐྲུན་པ།</p> <p>དྲུག། སློབ་གྲྭའི་མཛོད་ཁང་ལ་གཙང་སྦྲ་དང་སྤྱི་བའི་རྒྱུ་ནོམ་ལ་རྩིས་ལེན་ཞིབ་མོ་བྱས་ཏེ་སློབ་གྲྭ་མ་འཚོགས་གོང་གི་སྐབས་འདིར་མཁོ་གལ་ཆེ་བའི་ཅ་ལག་དག་མྱུར་ཏུ་མཁོ་འདོན་བྱེད་དགོས་པའི་འཆར་གཞི་བཟོས་པ།</p> <p>བདུན།གཞི་རིམ་གྱི་དྲོད་རླངས་མེད་པའི་གནས་ཚུལ་འོག་ཏུ་མེ་ཐབ་ནི་མེད་དུ་མི་རུང་བའི་དྲོད་ལེན་ཡོ་ཆས་སུ་གྱུར་ཡོད་པས།དུ་ཁུང་རེ་རེ་བཞིན་གཙང་སེལ་བྱས་ཏེ་སློབ་གྲྭ་འཚོགས་ཚེ་དགེ་སློབ་གཉིས་ཀྱི་འཚོ་བར་དྲོད་སྐྱིད་ཡོང་བའི་མཐུན་རྐྱེན་སྐྲུན་པ།</p> <p>བརྒྱད། ཕྱི་གཙང་གི་ནང་གཙང་གི་ཁོར་ཡུག་ལ་མགོ་རྔ་མེད་པར་དུག་སེལ་བྱས་ཤིང་གཟའ་ཐུན་པ་བགོས་ཏེ་དུས་ཚོད་ངེས་ཅན་གྱི་ནང་དུ་དུག་སེལ་བྱེད་པའི་ལམ་ལུགས་བཟོས་པ།</p> <p>དགུ ཞིག་གསོ་བྱེད་ཐུབ་པའི་སློབ་ཁྲིད་སྒྲིག་ཆས་དང་གཞུང་སྒྲུབ་ཀྱི་གློག་ཆས་རྣམས་ཞིག་གསོ་དང་ཞིག་གསོ་བྱེད་མི་ཐུབ་པ་རྣམས་གསར་བར་བརྗེས་ཏེ་སློབ་གྲྭ་འཚོགས་ཉིན་ནས་དགེ་རྒན་གྱིས་སློབ་ཁྲིད་བྱེད་ཐུབ་པ་དང་སློབ་མས་སློབ་སྦྱོང་བྱེད་ཐུབ་པར་ཁག་ཐེག་བྱས་པ།</p> <p>སློབ་གྲྭ་འཚོགས་ཚེ་འབྲེལ་ཡོད་སྡེ་ཁག་གི་བཀོད་སྒྲིག་དང་ཚན་རིག་དང་མཐུན་པའི་རིམས་འགོག་བྱེད་ཐབས་ལྟར་སློབ་གྲྭ་ཚོགས་གྲོལ་དང་ཟ་མ་ཟ་བ། སློབ་གསེང་བྱེད་སྒོ ལུས་རྩལ་སློབ་ཐུན།དེ་མིན་སློབ་གྲྭའི་རྒྱུན་ལྡན་གྱི་འགྲོ་ལུགས་མང་པོ་ཞིག་ལ་རིམས་འགོག་གི་བླང་བྱ་ལྟར་ཇུས་གཞི་བཟོས་ཤིང་།སློབ་ཁྲིད་སློབ་གསོར་བར་ཆད་མི་བཟོ་བའི་རྨང་གཞིའི་སྟེང་ནས་ནད་དུག་སྔོན་འགོག་སྐོར་གྱི་འཆར་གཞི་ཚགས་དམ་པོ་བཟོས།</p> <p> འདི་ལྟར་ངེད་སློབ་གྲྭའི་དགེ་རྒན་ཚོས་རྡོག་རྩ་གཅིག་སྒྲིལ་གྱིས་སློབ་གྲྭ་མ་འཚོགས་གོང་གི་གྲ་སྒྲིག་ཚགས་སུ་ཆུད་པ་བྱས་ཡོད་ལ།ད་དུང་མི་འདང་ས་དང་གནད་དོན་གང་ཡོད་ཀྱི་སྐོར་ལ་སློབ་གྲྭའི་འགོ་ཁྲིད་ཚན་ཆུང་གིས་གྲོས་མོལ་བསྡུར་གསུམ་བྱེད་ཀྱིན་ཡོད།གོ་རིམ་དང་ཞིབ་ཚགས་ལྡན་པའི་འཆར་གཞི་བཟོས་སྟེ་སློབ་འགོ་ཚུགས་པ་ནས་དགེ་སློབ་གཉིས་ཀས་བདེ་ཐང་དང་སྤྲོ་སྐྱིད་ཀྱི་སློབ་སྦྱོང་གི་འཚོ་བ་གསར་བ་ཞིག་རོལ་བའི་སྟ་གོན་བྱས་ཡོད་དོ།།</p>