<h3>སློབ་དཔོན།</h3><h3>སྐུ་ལ་མཚན་དཔེའི་དཔལ་འབར་སྟོང་དང་ལྡན།། </h3><h3>གསུང་དབྱངས་ཡན་ལག་དྲུག་ཅུས་རབ་རྒྱན་པ།།</h3><h3>ཐུགས་ནི་ཟབ་པས་ཡང་དག་མཁྱེན་བརྩེའི་གཏེར།།</h3><h3>སློབ་དཔོན་དམ་པའི་ཞབས་ལ་གུས་ཕྱག་འཚལ།། </h3><h3>གང་གི་མཁྱེན་དཔྱོད་ཀུན་གསལ་ལམ་ཡངས་དང་།། </h3><h3>བྱམས་དང་སྙིང་རྗེའི་ལྷག་བསམ་དག་པའི་དཔལ།།</h3><h3>འགྲོ་བ་ཀུན་ལ་མ་ལྟར་བྱམས་ཀྱིས་བསྐྱངས།། </h3><h3>བཀྲ་ཤིས་དོན་གྲུབ་ཞབས་ལ་གུས་ཕྱག་འཚལ།།</h3><h3>ཁྱོད་ཐུགས་ཟབ་པས་རིན་ཆེན་འབྱུང་གནས་དང་།།</h3><h3>སྙིང་སྟོབས་ཆེ་བས་གླིང་གི་རྒྱལ་ཚ་དང་།།</h3><h3>བདག་ལས་གཞན་གཅེས་སྤྱན་རས་གཟིགས་དབང་ཡི།།</h3><h3>བཀྲ་ཤིས་དོན་གྲུབ་ཞབས་ལ་གུས་ཕྱག་འཚལ།།</h3><h3> མི་རིགས་ཤིག་གི་སྲོག་རྩ་ཕྲ་མོ་དེ།།</h3><h3> ཆད་དུ་མི་བཅུག་དམ་པོ་འཛིན་བྱེད་པ།།</h3><h3> གངས་ལྗོངས་གཙུག་ལག་གོང་དུ་གཏོང་མཁན་ཏེ།། </h3><h3> བཀྲ་ཤིས་དོན་གྲུབ་ཞབས་ལ་གུས་ཕྱག་འཚལ།། </h3><h3> གངས་ལྗོངས་གཙུག་ལག་མ་ངོར་ཉམས་པའི་དུས།།</h3><h3> འཛིན་སྐྱོང་སྤེལ་གསུམ་བྱེད་མཁན་དམ་པ་ཁྱེད།།</h3><h3> བོད་ཀྱི་རང་གཤིས་དྲང་པོ་གནས་པ་ཡི།།</h3><h3> བཀྲ་ཤིས་དོན་གྲུབ་ཞབས་ལ་གུས་ཕྱག་འཚལ།། </h3><h3>གང་གི་གདམས་ངག་བདུད་རྩི་སྦྲང་ཆར་གྱིས།།</h3><h3>ན་གཞོན་ལྗང་ཆུང་མེ་ཏོག་བཞད་ལྡན་པས།།</h3><h3>དཔག་བསམ་རྐང་ཐུང་དགོས་འདོད་ཀུན་འབྱུང་སྟེ།།</h3><h3> བཀྲ་ཤིས་དོན་གྲུབ་ཞབས་ལ་གུས་ཕྱག་འཚལ།། </h3><h3>དམ་པ་ཁྱེད་ཀྱིས་དཀའ་སྤྱད་ཁྱད་གསོད་ངང་།།</h3><h3>བསླབ་བྱ་གདམས་ངག་མ་ནོར་ཡང་དག་སྟོན།། </h3><h3>བདག་བློའི་གཏི་མུག་མུན་པ་འཇོམ་མཛད་པས།།</h3><h3>བཀྲ་ཤིས་དོན་གྲུབ་ཞབས་ལ་གུས་ཕྱག་འཚལ།། </h3><h3>དམ་པ་ཁྱེད་ཀྱི་བསླབ་བྱ་རེ་བ་རྣམས།།</h3><h3>སློབ་བུ་ཁོ་བོས་མ་ལུས་ཡིད་ལ་འཛིན།།</h3><h3>དེ་ཚོ་འགྲུབ་པའི་སྨོན་ལམ་འདེབས་བྱེད་པས།།</h3><h3>བཀྲ་ཤིས་དོན་གྲུབ་ཞབས་ལ་གུས་ཕྱག་འཚལ།།</h3><h3> གང་གི་དྲིན་གྱིས་མ་ནོར་ལམ་ལ་སླེབས།། </h3><h3> བེམ་པོའི་ལུས་ལ་རིགས་ཀྱི་རྣམ་ཤེས་ཞུགས།།</h3><h3> སྙིང་གསོན་འདི་ཉིད་ཐོབ་པས་དྲིན་ཆེ་བས།།</h3><h3> བཀྲ་ཤིས་དོན་གྲུབ་ཞབས་ལ་གུས་ཕྱག་འཚལ།། </h3><h3>དུས་གསུམ་ལམ་སྟོན་རིན་ཆེན་སྒྲོན་མ་ཡི།།</h3><h3>འོད་ཀྱིས་རྒྱལ་བའི་བསྟན་དང་མཇལ་བྱུང་བས།།</h3><h3>སྡུག་བསྔལ་དག་ཅིང་བདེ་སྐྱིད་བདེ་ལྡན་པས།།</h3><h3>བཀྲ་ཤིས་དོན་གྲུབ་ཞབས་ལ་གུས་ཕྱག་འཚལ།།</h3><h3>ཁྱེད་ཀྱིས་གནང་བའི་རིན་བྲལ་གཞུངས་ལུགས་རྣམས།།</h3><h3>མ་ལུས་རྒྱུན་འཛིན་དར་སྤེལ་གཏོང་བ་དང་།།</h3><h3>གངས་ལྗོངས་གཙུག་ལག་མེ་ཏོག་བཞད་པའི་ཆེད།།</h3><h3>རང་ནུས་ཡོད་དགུ་གངས་ལྗོངས་འདི་ལ་འབུལ།།</h3><h3> </h3><h3> ༉སྤྱི་ལོ་༢༠༡༩ལོ་ཟླ་བ་༦པའི་ཚེས་༢༨ཉིན་བསྟན་འཛིན་ལྷུན་འགྲུབ་ཀྱིས་བྲིས་པའོ།།</h3>