那年，梨花开 Pasa pu pu sai

波东

Ka ai, dem ai: Bok Tong

　　Bum maron hku gahtong de da ai Gyagyi go, bum lago kon bum pungding du hkra hkai da ai pasa hpun ni hta pu ai pasa pu ni go maron ting apa pat rai hpro mat nga ai, pro di yu yang, chyahkring na laman bum maron hku hpro jong nga ai nsam go wamwam samui daulan jong ai wa rai kun? Shing nrai mahkup saiwan mahtang re hpe n chye yu ginhka na zon rai nga ai, atsom yu ai shaloi she, ngai mu mada ai go mahkup saiwan mung n rai, wamwam samui mung n rai to ai, shi go hpro nna wom tsom la ai pasa pu ni hkrai rai nga ai. Kong maron hkaro nhkap hkan ninghpang hte ninghpang, ninghpong hte ninghpong rai majo pu ai pasa pu ni hpe mu dat ai hte, myit nji n gu ganing n chye rai wa ai zon nga nga ai, goi lo, goi lo, nu e, nu e ndai daram ram hpro tsom ai pasa pu, ndai daram lo nna pu ai, ndai daram pu an ai, bum maron ting ahpro re sumpan hte gaup da ai zon, basi pu hpro wom jong ai zon mung arai nga ai, pu jo pu wom ni hpro nsam hkrai pri rai mat nga sai, mun lam du ai lamu ga hta hkai shatut ton ai pasa hpun ni, ten nhtoi gadi la hkat ai zon rai galang ta pasa pu pu hpo tsom nga ai ngu go, mu ai hte yu mang mat na daram rai nga ai. Ngai go ndai daram lo nna pu ai pasa pu ni hpe ndai lang, ndai shara ko sha mu yu ai majo, gabu gumlot na daram yu tsom dum nga sai, tsan tsan kon yu nga jang, latsa jan ning du sai pasa hpun ni go nampu majo gasha mi sha zon rai mat nga ai, le ko majo mi, wo ko majo mi, ndai ko womwom re majo mi, le ko womwom re majo mi, majomajo womwom re pasa pu ni go matut manoi rai mada ndap ai bum maron shagu hta pu an nga ai, pasa pu hpun lapran hkan ran ran rai gogap galo da ai wutdek nta ni hpe sha mu tim, dum nta dai ni ko nga ai masha ni hpe yu manon na zon rai nga ai, hpa majo nga yang, sumla soi ninghkring ni e soi sama da ai sumla gata na zon rai ai shara hta nga shanu lu ai hpe yu manon ai, tingsa ajan ja ai ten pasa hpun hpe shingnip shatai, gatsi bungli pasa lap gawut hprohpra ai nsen madat chyai, shagong shana pasa pu gata ko hpahka shadu lu let sumtu gamung jahta chyai, pasa si si wa jang hpun lakyin ting noi abya ai namsi yo chyai rai hkiba shamai la mai nga ai.

Yi-ngam sharot la rai hkra yu na she myit ni ai. Pasa pu maling gata hku bum maron hkan in gyigo nga ai modo lam a lamdung lahta hku hkom let yo garet mat wa ni ai. Amut mut rai marong marong re lakung lakang hkinlang lagra hkan ahpro hpro re pankop ni pyan pu nga ai, pankop gaang ko riri rai marong nga ai matsun nchyan e, chyanam chyang nsam re tarin noi ai hpe grai yu tsom dum nga ni ai, ndai ten hta pasa lap matsun nkau mi hpun lakran hkan ahkye hkye rai sha no maji kra wa nga ai, shara shagu ahpro nsam she madung nga ai, hpun shagu na pu ni womwom wopwop re hkrai rai nga ai, yo chyai nlo la nga sai, ndai hpun hta grau pu tsom sai ngu yang, le ra hpun na grau ai chyu zon rai, ndai maron hku grau pu an sai ngu jang, wora hkaro de she manu mana htat ai zon rai pu tsom nga ai, len hkrai len hkom mat wa na zon re shara hkrai rai nga ai, hpun nhpang kon lakying ndung nchyan du hkra pu, man ai shara pyi n mu hkra pu nga ai, pasa pu yo hkom ai ngai hkrai sha nrai, gumgai dingla hkontung hkonla hkonji hkonsek brangtung brangla branglung brang ram ni yong, pu an nga ai pasa pu hpe hkrai gabu hpu gari hkom nga ma ai. Pasa hpun nhpang ko tsap let shabung maumui shatai na datbung dem la, Gyagyi gahtong maron ting pu nga ai pasa pu hpe mu mada ai kong palo ko gashun gashe rai tsap let datbung gayat dem la mayu ai hkrai rai nga ma ai, yong mayong go pasa pu chyahkring na laman hkoi mat na tsang ai zon rai tin ai hkrai, gatsi bungli bung ahpot wa dam yang, pasa pu ni run hkrat ma na tsang ai zon, bungli rai n bung wa ai shong e gan dem la n ga nga ai zon rai, langai jan wa pyi rai n dem ngut lu nga tim, kaga langai shatin shapun rai bai lung shatep mani shada tsap bang wa wa rai nga ma ai. Kremra hte dem ngut ai htom, ta gyenan hte mung n dem la n lot lo, gyenan hte dem ai go, gahtet gamot nji n gu ya nan mano manang ni hpe shalai shagun shakong dan na ra nga ai.

　　Gyigo lammo hku lai wa ai pot pot modo a hpang de, yu dat u, run hkrat mat ai pasa pu ni hkan pyen gayop nang nga ai, palamla gasha ni hkan pyen gaboi nang ai shadu kau na zon pyi rai nga ai, ga hkan hkrat run bum to nga ai pasa pu ni hpe pro di mada yu dat ai shaloi, gyona bum to nga ai ngu pyi gan yu shadu kau na tai nga ai, shing nrai, sin hkrat hpro jong nga ai mung she zon rai nga ai, ga hkye ntsa hku atu ahpro hpro rai to nga ai pasa pu ni go, masha langai mi e mawat shingnoi gun in dingsang sang hkan gat ton ai zon, bungshi hpyi hpyi nga bung wa ai ten hta, pankop ni gale galau rai shamu shamot wa ai hpe sha yu chyai tim, ta lahpan lahkong hte hkan chyagot la hkom yu na zon ngu wa nngai, goi lo, gade hpro tu tsom ai nampu nampan ni raitim, ginding aga de sha hkrat du jang go ga sau namhpun tai na sha rai nga ai, bai nna, apu pu ai htom she asi si mai ai majo, nampu nampan run ai hpe yu yon hpa n rai nga ai, gabu hpa, myit sharot shara, myit mangoi hpang ai she rai nga ai.

　　Pasa pu maling hkan bu hkom masha ni a shaga nsen gachyo gachya  nga la ai majo, Miwa ngu ai go ganang du yang ganang garu gara chyu nga la ai ngu myit let grupyin yo chyai hkom nga ai shaloi, numroi gatnyeng a gadu nsen bai na dat ni ai, ngai a pungwang zahkong ntsa hkan ashoi rai pyen gayin kyin nga ma ai re, pu tsom nga ai pasa pu ni run hkrat mat na hpe tsang ai zon, hkying ten shachyut ai zon, le htit wo htit rai nampan chyu gaboi hkom nga ma ai, gadai mung ngai grai kyin nga nngai nga ai kumla hkrai rai nga ai. Gatnyeng ni sha kyin ai n rai, ngai mung kyin ai myit rong nga ni ai, pasa pu maron dam gaba la ai hte, yo nhpra na hpe go tsang, ndai hpun hta lakung she ngui hkra pu, le ra hpun hta grau wum tsom ai zon, myi she tsu hkra yu tim n hpra nga ai.

Loi loi chyang let hkom ra sai. Ndai shara hta hpro tsom ai pasa pu ni sha pu ai nrai, ahkye hkye re sawum pu ni pasa hpun lapran hkan grai no pu tsom nga ai re go, hpro ai nsam e magap gaput kau ai sha rai nga ai, pasa pu gaang hkan sawum pu tsat ai hta lai nna, ahtoi htoi re chyinghkrang pu ni, pasa hpun nhpang de pu gayot jong nga ai hpe sha mu tim, grai yu marit na zon rai nga ai re, nsam hkum dik la sai, hpro ai, hkye ai, htoi ai, tsit ai, mut ai... Ntsa lam pasa hpun hkrai tu ai zon rai, raitim, pasa hpun gaang hkan luidui hpun ni du hkra hkai jahkum da nga ai, kaga hkai nmai amyu myu mung no hkai shalom da ma ai, namsi namso sun mung rai, simo simai hkai sha ai sun mung rai, lamu ga hpe lahpot kau ai shara n nga ai hkai sha chye ai gahtong rai nga ai. Pasa pu maling gata hkan nachye hpai sharot let mu galo nga ai masha ni hpe yu dat tim, sumla gata ko na zon she shadu kau nngai, anhte bu hkom masha ni hpe yu chyai na matu dingsang sang galo masu dan ai non wa ni ai, ndai daram tsom ai ginra hta mu bungli galo ai ni hpe chye ba na n shadu ai, lama ba tim, nampan sun maling shingnip gata ko bansa la, nbung hpyi nga ai hte, pasa pu ni palamla zon poi gamong hkrat yu wa ai yu chyai  yang gade she pyo na rai nga ai, ngai lama rai yang go, myimyem myem kau rai bo hpe loi shadap ton in azim sha, pasa pu ni nbung hte susu sasa nga mong hkrat yu wa ai nsen hpe madat chyai let dung nga na rai nga ai, ndai ten hta ahpa leplep rai hpro tsom ai pankop ni go nang a myigrip mun, htonglong ladi nton, samram kara, wun-yo myiman hkan wa hkrat mara chye nga ai, myidi ton nna ta hte gan gajau dat tim lu gajau la na re, ngai go sumseng hpakang lagra ton rai ja la mayu ai, matut nna nbung lam de yon rai, mam jahkrat ai zon di pankop ni hpe jahkrat chyai na, shing nrai, manam marop chyai, gumhpuk chyai, gawut shapoi chyai, grau galo mayu ai go hka shin jarung gaba ko bang in hka shin chyai na hpe sharong ai, datshin hkan shing rai nampan hte hka shin ai hpe mu ai majo myit du ai re.

　　Malun gadong lung, chyaulang ahkyet lai, gaba lammo numda gale, pasa hpun maling gata hkan dat shalam rem ton ai u ni mung, yu chyai na numchying langai she rai to nga ai oi, ahpro hpro re pasa pu e ningrau ton ai hpun gata hta, hkrat run to ai pasa pankop ntsa hkan u ganu ni uhkai gasha ni hpe shingtai sumbra ahpre tam jo ai nga yang, grupyin de pankop ni amang rai ahpre shamong dat ai hpe sha mu tim, grai yu tsom dum nga ni ai, ura dingla wa u hkon ni hpe shalen ai ladat hpe she bai jom yu yu ga, pankop hpe achye makrang la yu, ga de prat ton kau yu, u ganu ni hpe rot mada dat yu rai, singkong ahpuk let gokgok! Gok! nga hkom gayin dat ai shaloi, pankop ni hkan mong gayin nang nga ai, u ni nga ai shara pyi nampu nampan shinggrup da ai shara rai to nga ai, u ganu ni don don udi di tim, ahpro wopwop re pasa pankop nyep ai chyingjat ko she di ton nga ma ai, pasa pu pu an ai ten, shara shagu pasa pu n hkrat to ai shara n nga nga ai, pasa pu a mungkan she rai to mat sai. Ndai lado hta, u ni nampu ahpre kau in tam sha ra, hkaimu masha ni mung pasa pu shingnip gata ko pankop ntsa e gabye let galo lu galo sha ra ai ginra rai nga ai.

　　Gyagyi mare na pasa pu ni hpe shinggan myisha hte sha mada n dap, gumdun lahkam htot nna sha n hkap nga ai, hkap hkun lahkap she kya wa sai, dongbuk akan mung kosi na wa ni ai, shing rai, chyahpung shachyang ndong awun hku pasa pu grai pu tsom ai nta langai ko shang wa ni ai, pasa pu yo nhtom myi go bau la lu sai, rai yang, kan a matu no ra ai majo, shani shat tam sha shang wa sai.

　　Ndo yang na pasa pu shingnip gata ko, grau manu pyo ai shara tam madu la hkra rai dung let grupyin no yo nga ai laman, htingra bungshi pasa pu gawut shapoi dat let ngai hpe hkap tau ai zon, chyahkring na lapran pasa pu marang htu ai hpa aro rai mong gapya wa ai go, myi she bo na daram pyen gaboi wa ra ai, ngai go gyona htu ai n mu yu ai majo, gyona htu yang mung ndai zon re rai na hpe shadu kau ni ai, lamu ting ahpro wom wom re pankop ni pyen gamong to nga sai, nta ntsa na kagam lahkyon hkan wa hkrat mara ai pankop ni, hka rim zon ru yu wa u ai, ndo yang ting pasa pu hpro jong mat sai, hkrat yu wa ai pasa pu ni hpe nbung e ndo yang shakum makau de gawut gahkyin dat ai majo, pankop ni hka panglai hka leng hta wa ai zon hpung hte hpung rai ganong wa nga ai, jahtum e shakum makau hku magyi mago ayan akan hpunggo she do hkra rai wa hkring to nga masai.

　　Ndai ten hta pasa pankop ni madu kam ai hku wam hkom lu nga masai, galap mahka nga ai kagam lapran hku gumtsun yu wa in dodap de hkon bang nhtom, sabon lahkum hkan sa manam dung nga masai rai, gok de na sut ntsa, yupku e kam ai hku gumkan gongleng chyai nga ai, shat gok na gaap nga ai hka yam hta hkrat bang ai pankop ni grau, panglai laing ko tsot hkom nga ai lahko wonli zon she rai nga ai, di hka-wan jarung ni hkan, hkring manu ai shara ma hkra hta hkring nga masai re, bagan gaba langai hta nta madu ni pankop grai di bang ton ai hpe mu ni ai: Hpa di na ngu di gahkyin ton ai rai? Sha na ngu di ton ai, pankop sha mai ai i? Sha mai ai le, pasa si pyi mai sha ai go pu mung sha yu na re ngu, nta madu ni udi hte gangau ya na nga tsun ai hpe galo yu mu ngu htan ya ni ai. Hpro tsom la ai pankop hpe gahtet dik ai sau di de bang dat gui na zon pyi n rai nga ai, raitim ahpro hte ahtoi, gangau shapro dat ai nsam ni grai htuk to nga jang, jailai ninggau(n-gup) de hta bang dat wam na zon n rai nga ai, yu chyai na simai langai rai to mat sai.

　　Masha buga tsom ai sa mu, masha ni sut su nga mai ai sa mu chye da, masha ni a nga ginra mung anhte Jinghpo bum ga na hte ganang nshai nga ai, maren nhkap nchyap re bum hkan galo lu galo sha, ga sau n rong ai ga hkye kong maron hkan nga tim, lu su ma ai, masha ni a buga go yong mayong hpe sa chyai yu shangun mayu mai, myit mangoi shangun lu, marit ningtsing gatu shangun ai buga ginra byin tai lu nga ai, yu hkom yu wa rai ai hpang myit lu ai, hpa mu galo hpang wa tim htom hpang de na du hkra, dam lada masing gaba ai hku galo hkrat wa yang chyu sha ongdang ai lam pru nga ai, Gyagyi gahtong na pasa sun ndai ni go lu sha pasa ngu ai re, ntsin lo nna dui ai, nsam mung tsom ai, moi galo sha ai bum hkauna hkan du hkra pasa hpun hkai kau nga sai, latsa jan ning du ai pasa hpun grai lo ai hta n-ga, daini matut manoi no hkai jat dingyang rai nga ma ai re, hpang de buhkom masha ni a hpaga sha ga nna, ja gumhpro gade no tam pyo na rai nga ma ai, buga na gatrai dut lu dut sha, lagat rem, wa yo, u rem, shat seng, manam jarop hpo, hpaga laning hte laning rot jat wa chyalu rai nga ai, ndai zon re ginra hta gumhpro go n ra tim shi hkrai shang wa chyalu rai nga ai, modo lam mung asuya kon galo shatsom da ya, namsi n lu dut sha na hpe mung n myit tsang ra, gathkyot hkyot ai ni nta ko modo hte wa di hkyot la kau ya chye nga ai, madu go nta ndo ko dung nga let gumhpro hti nga na sha rai nga ai, Miwa mung asuya kon woi da-kan ai matsan shatong kau na bandung go aloi sha lu shatup na rai nga ai. Htingra ta hta nampan yu, mangai ta hta namsi namso sa di sha chyai ai masha ni hte hpaga masha a majo, shinggan pyi n pru ra ai hpaga ga na rai nga ai, nshung ta hta ahkye hkye re pasa lap sa yu ai masha nto nma bai yan chyalu re, anhte Yinnan ga na masha ni go tsit lali ai ginra lo ai majo, ganang na shara hta namlo namlap grai tsit tsom ai nga yang, sa yu ai masha nau n nga na re, ganang na namlap yahte grai hkye tsom, shing nrai, run hkrat sai da nga yang chyom go, wurut ru ai zon hto sa wa nna sa jom yu ai masha kagyin hta pyi grau ai hku mong na raise nga ai.

　　Gyagyi gahtong na pasa pu a hpro nsam hpe ganing ngu tsun jahpro dan na n chye mat ai daram yak to nga ni ai, ga si ga hko htum mat ni ai, hpa hte jahpro jahtap tsun na kun, sumpan pro hte shabung yu, samui zon hpro, saiwan zon hpro, basi pu zon hpro, nga chyu laing ko nsam chya la ai zon, namhtun jahkui ko hkalui pru wa ai zon, gahtong ting lamu gasa wam hkom nga ai zon, hpa hte no mai shabung jahtuk nga ai kun? Yu tsom ai go tsun n ma to nga sai, ngai chye tsun ai laika hkum ngau ni hte sha ka shachyo yu tim, hpunda n du n du nga nga ai, Edin sun ngu ai go ndai zon re shara hpe tsun ai rai jo ai ngu myit la ni ai.

　　Pading sumtsan Gyagyi gahtong ko pu tsom nga ai pasa pu ni go,  galoi mung ngai hpe sumhtang marit yan shingran alu shangun nga sai rai.