<p>ད་ལོའི་ཟླ་དགུ་བའི་ཚེས་པ་དྲུག་གི་ཉིན་མོར༼དཀར་མཛེས་ཁུལ་དམའ་འབྲིང་ན་གཞོན་བོད་ཡིག་དགེ་རྒན་གྱི་སློབ་ཁྲིད་དཔྱད་བསྡུར་དང་གསོ་སྦྱོང་བྱེད་སྒོ་ཐེངས་གཉིས་པར༽ཞུགས་ཆེད་ཤུལ་རྫོང་སློབ་གསོ་ཅུས་ཀྱི་རེ་བ་ལྟར་ངེད་སེར་ཤུལ་རྫོང་མི་རིགས་བཅའ་སྡོད་སློབ་འབྲིང་གི་སྐད་ཡིག་ཚན་ཆུང་གི་དགེ་རྒན་ཚོས་ནང་ཁུལ་ནས་སློབ་ཁྲིད་འགྲན་བསྡུར་བྱས་ནས་ཕྱོགས་བསྡུས་འབུལ་ཐོན་གྱི་དགེ་རྒན་དོན་གྲུབ་དབང་རྒྱལ་རྫོང་རིམ་པའི་འགྲན་སྡུར་ལ་ཞུགས་པ་རེད།</p> <p>ཟླ་འདིའི་ཚེས་བཅུ་གསུམ་གྱི་ཉིན་མོར་སེར་ཤུལ་རྫོང་སློབ་འབྲིང་གི་སྐད་ཡིག་དགེ་རྒན་དབྱིངས་རིག་མཚོ་དང་འགྲན་ནས་རྒྱལ་ཁ་ཐོབ་དེ་སེར་ཤུལ་རྫོང་གི་འཐུས་ཚབ་བྱས་ནས་ཁུལ་རིམ་པའི་འགྲན་བསྡུར་ལ་ཞུགས། </p> <p>ཟླ་འདིའི་ཚེས་ཉེར་གསུམ་ཉིན་དཀར་མཛེས་བོད་རིགས་རང་སྐྱོང་ཁུལ་གྱི་རྫོང་ཁག་སོ་སོ་ནས་ཕུལ་བྱུང་འཐུས་ཚབ་པ་དགེ་རྒན་གཅིག་རེ་འདེམས་ནས༼དཀར་མཛེས་ཁུལ་དམའ་འབྲིང་ན་གཞོན་བོད་ཡིག་དགེ་རྒན་གྱི་སློབ་ཁྲིད་དཔྱད་བསྡུར་དང་གསོ་སྦྱོང་བྱེད་སྒོ་ཐེངས་གཉིས་པའི༽འགྲན་སྡུར་ལ་ཞུགས། ཐེངས་འདིའི་འགྲན་སྡུར་རྣམ་པ་མི་འདྲ་བ་གསུམ་སྟེ་ཁྲིད་བཤད་དང་སློབ་ཁྲིད། ཕྱོགས་བསྡུས་བཅས་རིགས་མི་འདྲ་བ་གསུམ་ལ་བཀར་ནས་འགྲན་བསྡུར་བྱས། </p> <p>མཇུག་མཐར་སེར་ཤུལ་རྫོང་ནས་ཡོང་བའི་དགེ་རྒན་དོན་གྲུབ་དབང་རྒྱལ་ལགས་ཀྱིས་ཁྲིད་བཤད་ཐད་ནས་ཨང་དང་པོ་དང་། སློབ་ཁྲིད་ཀྱི་ཐད་ནས་ཨང་དང་པོ། ཕྱོགས་བསྡུས་ཐད་ནས་ཨང་དང་པོ་བཅས་ཕུལ་དུ་བྱུང་བའི་གྲུབ་འབྲས་བླངས། </p>