老盛泽五花八门格老行当 远去的家园第八季

庄子明

庄子明图

吴伯华文

盛泽老早么，人称小上海，故如365个行当么缺起来也有限适是待。从金银首饰到修缸补瓮，磨剪刀，弹棉花，打铁，箍桶匠，小热昏卖糖，终归话得出样样侪有。西荡口到东白洋格市河两边么侪是各式各样个店家唠作坊。市河北面么朝南向阳，故如店家亦要多点。谷香村，汪鼎兴，孔雀理发店，中牛倌，布线店，同福，石库门堂馄饨店，小百货侪勒北滩。呒不店面刮人么，只好早出夜归，勒河海边出个摊。东庙桥角笃浪是汤福官格娘摆个香烟摊头。要笑煞人啦，旁边还放好只马桶。香烛，纸扎，烟纸，鞋子，做衣裳格种夫妻老婆店么侪勒弄头弄脑。顶顶苦恼子格么要算刮走作师傅，风里雨里吃百家饭，真讲叫免讨饭罢待。

西庙边浪有家单开间格秤店，生意好到野脱。

东海太平街箍桶店，老板姓许，做生意规规矩矩，小另子散格铜钿蛮好寻两钿，故如吃到矮倭臀奘福德德。老板娘娘也人缘蛮好。自家勿养小辈唠领一个囡鱼，叫明珠。那么侪家叫老板娘“明珠娘娘”。

铜锡作

东庙桥，得意楼茶馆店对过是铁匠店，老板姓沈，绰号"逃得快"。伊奴打铁功夫蛮到家。听人家讲，伊打个橹板圈扎制到野脱。故如铜钿寻起来省力煞。老古话讲起来: 木匠做一工，铁匠只要烘一烘。

凉伞作坊

修棕绷，绷棕垫么蛮多是宁波，绍兴人。

凌家桥下面有家棉花店，店堂里么就有伙计勒嚯弹棉花被头。背浪要背只弓，前面么有根羊肠线，弹格辰光，手里有个木榔头要敲线，敲起来会得同琴也格响格，人么还要铳脱铳上，好比勒嚯跳舞。

梭子作

梭子弄里厢有人家做梭子格。拨织布格人家用，故若叫梭子弄。梭子弄往西面点，有条彩坊弄。是条半条头弄，也叫瞒弄堂。实际浪么海边个邻舍侪晓得里厢穿过一家人家格厅就可以走到梭子弄。

削刀磨剪刀

磨剪刀，绷粽垫，弹棉花格走作师傅；挑葱卖菜，卖棒冰，收旧货，卖糖格贩子侪会得唱两声。小百戏总归要学脱两句。

阿有坏格粽绷修?

削刀磨剪刀! (欢喜拆科格么板要后头同伊加一句"撤尿割卵泡")

油坊

草纸作

市河南面，当房隔壁就是篮笪店。

讨新娘子，囡鱼出嫁侪要到金店打项链，戒指，耳朵圈。小百喜出世么打镯头，锁片，讨吉利。

东白洋，煤球厂煤场，原来就是修船场。跑过船场，总归听到叮叮咚咚格修船声。修船用桐油拌石灰加麻丝嵌进去，敲着实，等到干仔，浸了水里格船就勿会烂。

酱园店么搭画里一样有只半人高格账台，专门卖油盐酱醋唠过粥小菜。后门头么有片白场，场浪有几嚯格七石缸，卖个么事多数侪是勒格牢格杜做货。老早也勿搭现在也格弄点啥侪要放防腐剂，格歇光么侪是出赤天露日摆勒外头，碰着落雨唠盖一盖。酱缸里蛇虫百脚也有格，苍蝇叮仔还要出蛆，扭法扭法。叫勿看见么当伊呒介事，眼勿见为净，看着仔隔夜饭也要呕出来，啥人触祭得进呀？

锈花娘子

鲍家弄“久和米行”贴对么是卓顺师傅开个白铅店。日日看伊拉夫妻两个敲敲督督忙到只勿得脚也掮起来。雕叫做起做到鬼叫，也勿寻啥铜钿。养仔四个小人到侪蛮登样。皮肤雪白粉嫩，男也架型唠女也齐整。苦么苦，伊自家到也落出肚子。一路做生活么戏也唱唱，蛮自得其乐。

摇绳店勒秀才浜，派出所对过。绳么有棕绳，麻绳，还有柴绳。

勿知阿有人记得，格辰光有个毒头，姓戚，侪家叫伊毒阿龙? 也大概读过两年书，伊到识两格狗逼字。十七八岁格兆俚头，有点花痴，便也痴了街浪作"报告"。面孔么笑嘻嘻，话喊侪家，伊么苦煞，屋里有只柴绳机，要叫伊一日到夜摇绳。还话伊么有个女朋友，勒上海针科大学读书。格辰光个人么触祭仔空得嘶，侪勒大街浪嗡牢伊，听伊"作报告"，日日格两声，就是听勿厌。有两个十三点么还要拆伊科，弄伊头颈。阿龙格大佬就是盛泽赫赫有名格说书先生戚家平。戚家平格倪子末来当盛泽镇副镇长格。人好到勿得了。

雕作店

槽坊

蔡福么实际浪是爿南货店。那么小地方么管伊三七廿一，杂七杂八格么事也侪要卖格。干货，蜜饯，糖果包扎，火腿，香烟样样有。店么勒新街浪转弯角子，对过么修钟表。店堂么三开间门面，宽舒到海伟。呒不生意格歇么，店里厢格伙计看看野景，南千田，北万地，谈谈三海经到也蛮乐惠。有常时，有刮吃得空格熟人么也要戤上去戤脱两声。那么，有两个老鬼三，勿识相，真叫十三点，腻百伍，卵也勿懂一只么偏要叽呱带喊，碰着有知识格人么皱皱伊鼻头，脖转就走；碰着勿卖账格犟头鬼么就要同伊拉寻相骂，弄得勿好还要打相打。

太平街，三泰染坊

石匠师傅雕狮子

北斗(钵头)弄西隔壁有家人家么雕花格。台条椅櫈格种硬头家生浪格花板么侪叫伊拉雕格。

造房子格泥水木匠

绸业公司场浪格角朶里有一对夫妻爆咚米，姓李。公婆两个侪蛮好人，善兮兮。

裱糊匠

升明桥南堍有个毡毯作

老早头么，勒乌新桥头有个人叫阿大。开爿剃头店。到末来么转拨朱海观开。伊么叫讲起三海经来头头是道。到现在么伊啦女婿开勒嚯。末底来，剃头店搬到对过。转拨团子店，一直开到也在。

小品

盛泽人卖豆腐

老板：老板阿要买豆腐

顾客：纳哈卖，几钿一块

老板：两块

顾客：阿是两块一块

老板：一块

顾客：格么是一块两块

老板：二块

顾客：到底是两块一块，还是一块两块

老板：是两块一块

顾客：格么就是五角洋钿一块

老板：不卖待，拔纳弄到老子糊涂特待

顾客：啥人要买纳个么事，个怪弄不清爽，开只卵个店，自家卖块豆腐撞撞杀么好蛋

老板：个么二块一块么好待，反正纳要寻死么，纳个赤佬喫老子豆腐啊!

棒头上出孝子，筷头上出逆子

听隔壁三卵讲，金**啦末拖昨日被几个大盖帽弄去待。勿晓得为点啥。不过，金家个撒煞鬼，生啦迟早要进去。侪是金**自家作个孽，今朝朝唠么懊牢都来勿及，真叫百脚咬胴肛，有苦说勿出。

金格里对个娘派啦到死，待个小死尸么，好比养着个绯金卵头子，要风得风，要雨得雨。倘便倪子要个月亮，伊尽可做仔只长护梯帮伊去拿。罪过啊，抱了风里怕冷，含了嘴里怕烊，吞落去怕自己哽。吃顿头廊，小菜要小牌位一家头吃，别人家筷亦叉勿落。滋滋刮刮，鸭荡滩能吃仔一台子，还要出袈印，上头两个阿姐被伊活欺煞，一勿称伊心，日娘捣逼侪骂得出。娘管管伊，金**要骂家婆。那今朝晓得害伊待。来勿及待，老古话么总归一点也呒不仓脱，叫: 棒头上面出孝子，筷子下底出忤孽！

门槛精

也要话起隔壁个伯老师，人么亦瘦亦加黑，赛过一只干瘪老鼠，看上去寿头寿脑，一点也勿像个老师。一日到夜，只想挞人家便宜。勿晓得哪哈嚯，人家挑过担粪担，伊也要去蘸蘸看，剩怕便宜逃脱。到街廊去买小菜，人家门槛九十六，伊要精到九十八。同人家乡下人买两棵小白菜也板要便宜点。还人家价钿么，要杀到根。称个辰光么，称头呆板要仙点。称好仔么，还要饶点，饶仔一趟勿算数，还要再饶点，弄到结果，买少讨饶多。人家乡下人火起来待，搭伊讨仔一场相骂，索性勿卖拨伊待。惹伯老师倒也火起来，话喊乡下人: 生啦什噶，乡下人靠天，街廊人靠尖。 吾听听实在听勿落去，心里想，伯老师啊，你什噶精法么，也勿曾看见你发财啊，屋里厢挑挑卖卖亦勿值几个铜钿，身头面廊着得搭叫化子错勿多。要么真个老古话讲: 要想发财，命里勿该。

故如(音:搁落)，随便啥事体，覅过分，乖也吃一半，呆(毒)也吃一半。嚯搭个仲家八阿爹看你糟卤汤吃惯，要拔你挞便宜？实勿知，精唠精，布衫裤子剩条筋。

织布人家

洛丝娘