老盛泽五花八门格老行当。

Yestoday

盛泽老早人称小上海，故如365个行当么缺起来也有限适是待。从金银首饰到修瓮补坛磨剪刀，弹棉花，打铁，箍桶匠，小热昏卖糖，终归话得出样样有。从西荡口到东白洋格市河两边么侪是各式各样个店家唠作坊。市河北面么朝南向阳，故如店家亦要多点。谷香村，汪鼎兴，孔雀理发店，中牛倌，布线店，同福，石库门堂馄饨店，小百货侪勒北滩。呒不店面刮么人么，就加早出夜归，勒河边出个摊。香烛，纸扎，烟纸，鞋子，做衣裳格种夫妻老婆店么侪勒弄头弄脑。顶顶苦恼子格么要算刮走作师傅，风里雨里吃百家饭，真讲叫免讨饭罢待。

西庙边浪有家单开间格称店，生意好到野脱。

东海太平街箍桶店，老板姓许，做生意规规矩矩，小另子散格铜钿蛮好寻两钿，故如吃到矮倭臀奘福德德。老板娘娘人也缘蛮好。

铜匠店

磨剪刀，绷粽垫，弹棉花格走作师傅；挑葱卖菜，卖棒冰，收旧货，卖糖格贩子侪会得唱两声。小百喜总归要学脱两句。

阿有坏格粽绷修?

削刀磨剪刀! (欢喜拆科格么板要后头同伊加一句"撤尿割卵泡")

东庙桥，得意楼茶馆店对过是铁匠店，老板姓沈，绰号"逃得快"。伊奴打铁功夫蛮到家。听人家讲，伊打个橹板圈扎制到野脱。故如铜钿寻起来省力煞。老古话讲起来: 木匠做一工，铁匠只要烘一烘。

凉伞作坊。

凌家桥下面有家棉花店，店堂里么就有伙计勒嚯弹棉花被头。背浪要背只弓，前面么有根钢丝，弹格辰光，手里有个木榔头要敲根钢丝，敲起来会得同琴也格响格，人么还要铳脱铳上，好比勒嚯跳舞。

市河南面，当房隔壁就是篮笪店。

讨新娘子，囡鱼出嫁侪要到金店打项链，戒指，耳朵圈。小百喜出世么打镯头，锁片，讨吉利。

东白洋，煤球厂煤场，原来就是修船场。跑过船场，总归听到叮叮咚咚格修船声。修船用桐油拌石灰加麻丝嵌进去，敲着实，等到干仔，浸了水里就勿会烂。

连顺酱园么搭画里一样有只半人高格账台，专门卖油盐酱醋唠过粥小菜。后门头么有片白场，场浪有几嚯格七石缸，卖个么事多数侪是勒格牢做格。老早也勿搭现在也格弄点啥侪要放防腐剂，格歇光么侪是出赤天露日摆勒外头，落雨唠盖一盖。酱缸里蛇虫百脚也有，苍蝇叮仔还要出蛆，扭法扭法。叫勿看见么当伊呒介事，眼勿见为净，看着仔隔夜饭也要呕出来，啥人触祭得进呀。

绣花娘子。

路头堂久和米行贴对么是卓顺师傅开个白铅店。日日看伊拉夫妻两个敲敲督督忙到只勿得脚也掮起来。雕叫做起做到鬼叫，也勿寻啥铜钿。养仔四个小人到侪蛮登样。皮肤雪白粉嫩，男也架型唠女也齐整。苦么苦，伊自家到也落出肚子。一路做生活么戏也唱唱，蛮自得其乐。

摇绳店勒秀才浜，派出所对过。绳么有棕绳，麻绳，还有柴绳。

勿知阿有人记得，格辰光有个毒头，姓戚，侪家叫伊毒阿龙? 也大概读过两年书，伊到识两格狗逼字。十七八岁格兆俚头，有点花痴，便也痴了街浪作"报告"。面孔么笑嘻嘻，话喊侪家，伊么苦煞，屋里有只柴绳机，要叫伊一日到夜摇绳。还话伊么有个女朋友，勒上海针科大学读书。格辰光个人么触祭仔空得肆，侪勒大街浪嗡牢伊，听伊"作报告"，日日格两声，就是听勿厌。有两个十三点么还要拆伊苛，弄伊头颈。

蔡福么实际浪是爿南货店。那么小地方么管伊三七廿一，杂七杂八格么事也侪要卖格。干货，蜜饯，糖果包扎，火腿，香烟样样有。店么勒新街浪转弯角子，对过么修钟表。店堂么三开间门面，宽舒到海伟。呒不生意格歇么，店里厢格伙计看看野景，南千田，北万地，谈谈三海经到也蛮乐惠。有常时，有刮吃得空格熟人么也要戤上去戤脱两声。那么，有两个老鬼三，勿识相，真叫十三点，腻百伍，卵也勿懂一只么偏要叽呱带喊，碰着有知识格人么皱皱伊鼻头，脖转就走；碰着勿卖账格犟头鬼么就要同伊拉寻相骂，弄得勿好还要打相打。

太平街，三泰染坊

石匠师傅端狮子。

北斗(钵头)弄西隔壁有家人家么雕花格。台条椅櫈格种硬头家生浪格花板么侪叫伊拉雕格。

造房子格泥水木匠。

修棕绷，绷棕垫么蛮多是宁波，绍兴人。

绸业公司场浪格角朶里有一对夫妻爆咚米，姓李。公婆两个侪蛮好人，善兮兮。

磨剪刀。

裱糊店。