<h3>听人家讲阿拉上海有一片石库门房子叫张园。老底子是“海上第一名园”一一张家花园所在地，主人家是无锡人张鸿禄(字叔和)。伊又是做官又是做商人，有立升，拿张园经营成清末上海滩名气最响e休闲所。</h3><h3> <br></h3><h3> </h3><h3> </h3><h3> </h3><h3> </h3><h3> </h3> <h3>当年，霍元甲勒此地摆过二趟擂台，打败过外国大力士。当年，此地点亮了上海第一盏电灯。当年，此地开了上海第一家室外照相馆。当年，中国最早话剧勒此地演出。当年，此地已有白相项目“激流勇进”跟“过山车”……当年，上至达官贵人下到升斗小民，全部欢喜勒此地轧轧闹猛白相相。<br></h3><h3><br></h3> <h3>后来，张园江湖老大地位被大世界等小阿弟抢塌了。没落以后，张园地块改建成里弄住宅，里厢汇集了28种不同风格石库门房子，伊又风风光光成为了“海上石库门博物馆”。</h3> <h3>2019年1月12日，朋友孙志伟先生讲伊也有套张园房子，动拆迁以后旅游白相可以升升级，跟女神(夫人)一道适适意意游世界。果真，张园动拆上了电视新闻，孙先生作为张园原住民也一道上了《新闻坊》。</h3> <h3>2月22日，张园居民首批集中搬迁开始了。</h3> <h3>欢喜轧闹猛e上海人，纷纷出动，抓紧辰光抢了3月8日全部拆空前头去一趟张园，白相e白相，拍照e拍照。游张园又成了新时髦!</h3> <h3>2月24日上半天，“周游群”&“老房子俱乐部”也组织阿拉跟沪上知名行走建筑师小东老师(周培元)、张园老住客孙志伟先生一道游张园。阿拉一面走一面听伊拉讲讲张园e建筑、咸话咸话张园里厢e老故事。</h3> <h3>孙先生熟门熟路，带牢阿拉一帮人，登上了张园制高点一一威海路590弄41号(原麦加利银行买办王宪臣私宅)。有人猜想过，此地可能是老张园有名e“海天胜处”剧场所在地。</h3> <h3>极目远眺，朋友梦梦老师讲法真稀奇! </h3> <h3>伊讲噢，远处现代摩天楼像伟岸的美男子，而红色砖瓦的张园老房子像一个个婉约的江南俏佳人。</h3> <h3>侬看，有点意思伐?</h3> <h3>下了楼，楼道里碰实了商业摄影师王钢锋老师。一帮人又一道涌进了伊101室摄影工作棚。东看看，西摸摸，原来网红石库门弄堂照片就是从此地加工出笼滴。</h3><h3> </h3> <h3>问伊讨二张石库门弄堂网红照，伊只肯拨勒阿拉每人三张名信片。</h3> <h3>“勿拍了!勿拍了!” 弄堂照片拍到了顶，钢锋老师也要打包走人了。</h3> <h3>拉上钢锋老师，勒伊曾经e照相馆，阿拉一道拍照留念。</h3> <h3>跟小东老师来到张园边浪厢、石门一路315弄6号(原“斜桥弄巨厦”)公惠医院。</h3><h3> </h3> <h3>小东老师讲此地霞气赞，设计师是大名鼎鼎e邬达克。</h3> <h3>爬爬旋转楼梯，上上下下，感受感受大师e经典设计。</h3> <h3>荡到威海路106弄2号(原中联轮船公司大股东周庆云老宅)。</h3> <h3>门口头椭圆形玻璃窗，也是钢锋老师欢喜e取景地方。</h3> <h3>威海路590弄77号(王宪臣弟弟、原花旗银行买办王俊臣私宅)门口，阿拉跟保安小师傅饶了老半天，讲了嘴巴起泡，就想进去打打卡。</h3> <h3>咦，想跟格莱汉姆.布朗设计e，漂亮e绿颜色圆形屋顶同框。但是，为啥拍勿好? </h3> <h3>“您可以航拍呀!” </h3><h3>保安小伙子用普通咸话，慢吞吞、笃悠悠，瞪了我一句。</h3> <h3>“来的都是客”</h3><h3>张园大客堂门口，留下一张集体照。</h3> <h3>我还勿肯走，再单独来一张。</h3> <h3>九十多岁额老阿奶，伊也勿舍得跑。</h3><h3>伊讲伊勒此地住了一辈子，就算天天拾垃圾也要留了此地块。</h3> <h3>东张西望，一跑跑到了人家卫生间，想看看平头老百姓e日常生活。</h3><h3>主人阿姐勿拿阿拉当外头人，电灯开了敞敞亮，让阿拉拍了爽气。</h3><h3>“我已经搬脱了，就是来看看还有啥忘记脱e伐” </h3><h3>噢，原来伊也勿舍得跑!</h3> <h3>王家阿婆照样阳台浪厢浇浇花。</h3> <h3>张家老伯伯照样坐勒弄堂口。</h3> <h3>万国旗照样飘</h3> <h3>被头照样晒</h3> <h3>东家长，西家短，山湖照样嘎</h3> <h3>老爷叔跟张园一眼勿搭界，附近买好了点心，也过来坐一坐，挤一挤闹猛。</h3><h3>侬看伊，面孔笑成了一朵花，</h3> <h3>笃笃笃 卖糖粥 三斤胡桃四斤壳 吃侬肉 还侬壳</h3> <h3>阿囡啊，阿爹实在舍勿得走!</h3> <h3>格地方蛮稀奇，有看勿光e西洋镜。</h3> <h3>此地是“东吴世泽”，此地是“福履绥之”，此地是“人杰地灵”，此地是“紫气东来”(威海路590弄72支弄11号甲门头，原属金融界巨子俞佐廷，当年名叫“吟梅山馆”)</h3> <h3>沪上知名海派文化女作家惜珍老师讲起过，听过讲过勿算数，一定还要自家去走一走。</h3> <h3>集体寻游一结束，一家头，我又折回到106支弄2号周宅，穿过铁栅栏，一头钻进了小花园。</h3> <h3>只见芳草萋萋，杂物四下散落。一只，长长扁扁e，小板凳，倒插了烂泥地里，像一艘静卧海底e船。噢，“太平轮”?!</h3> <h3>“侬欢喜，就拿去好了”</h3><h3>边浪厢，盯了我有一歇e一位老阿姐讲: “我跟花园主人是隔壁邻舍，没关系，丢脱了，丢脱了……”</h3> <h3>终于，拎起小板凳我离开了张园。</h3><h3>小板凳啊，小板凳，请侬跟我讲一讲: 中联轮船公园大股东周庆云以及周家后代勇担肩胛，接力还债e好故事。</h3> <h3>笃笃笃 卖糖粥 三斤胡桃四斤壳 吃侬肉 还侬壳</h3> <h3>有人讲大概是1919年，拿张园历史分成前后两个不一样e张园。</h3> <h3>今年，2019年，正好又过了100年。</h3><h3>是碰巧?是必然? 张园历史又要翻开新篇章。</h3> <h3>此路勿通! </h3><h3>2019年3月9日，正式封园了。</h3> <h3>“腾笼换鸟"以后，张园一定会成为阿拉上海又一道新风景!</h3><h3><br></h3><h3></h3> <h3>到辰光，朋友们，阿拉再一道游游新张园，咸话张园里厢e新故事。</h3><h3>侬讲，好勿好?</h3>