看雪花飞舞，待梅花盛开

铮铮

　　今年第一场初雪行色匆匆，有点急不可耐。我透过玻璃窗向外望，看见雪纷纷扬扬落了蛮大。一朵朵雪像一个个小精灵在漫天飞舞，弥漫天空。仔细观察伊又像一个身穿白裙子个小天使在半空旋转跳芭蕾。南方落雪是勿大常见个，所以蛮稀奇个。今年在乌镇雅园能碰到这场雪，真像是期待久别后重逢搿情人，令人兴奋，更让我欣喜。

雪花在眼门前飞舞，脑子里又想起小辰光落雪搿情景。小辰光小朋友就盼望落雪，落雪可去堆雪人、厾雪球、打雪仗。记得有一趟我堆雪人棉鞋弄湿了，回到屋里向怕外婆骂，结果外婆呒没骂我，外婆帮我湿棉鞋放了煤炉边浪烘，又帮我充了只烫捂子，叫我脚放了烫梧子浪向捂捂伊。现在回想起这桩事体感觉蛮好笑。

　　南方飘雪，寒气袭来。一歇歇地浪向就白了，雅园银装素裹，湿地公园绿色草坪无影无踪，草坪浪向盖了一层白色棉被，只看见一棵棵杉树在风雪中傲然挺立，村枝搭仔树叶上挂满了毛茸茸亮晶晶个雪，远远望去，好似一派“北国风光”景色怡人。啥人会相信这是南方的雪景呢。

抬头仰望，亭楼屋顶青瓦上面还堆满了积雪，青瓦白雪并联相交，像串起银色项链镶嵌在屋檐浪向，勾勒出一幅美丽个镜框。

真叫人分勿清搿是景，还是画。

　　转身回头遥望湖边，见树叶搭仔树枝浪向全部堆满松软晶莹个积雪，经过风雪洗礼后个白马湖显得更加宁静庄严。眼前一幅幅景色，真像绘画大师吴冠中先生身前绘画个水墨画，美不胜收。

　　雪无语但雪有情。当雪花落在我掌心个辰光，雪花马上融化变成清纯个泪滴，这是伊对人间依依不舍离去个表白。

我感谢这场初雪，柔情似花，伊打开了我封存已久个记忆，温暖了我个心田。

我感谢这场初雪，伊一往情深将山川盖上厚厚个棉衣。润泽了山川树木。

我感谢这场初雪，用真情融化晶莹，将清纯泪滴丰盈了大地。愿这场初雪定格成不老个情怀，看雪花飞舞，待梅花盛开。