<h3><br> ལོ་ཟླར་འཐེན་པའི་དངན་པ།<br><br> _________རྣམ་འབྱེད་ཤེས་རབ།<br><br>བཀའ་པོཏ་སེངྒེའི་འོ་མ་ལས་བསོད་ཀྱི་ཟོ་བར།།<br>ཚེ་འདིར་ཤེས་བརྩོན་ལག་པས་བཞོ་རྒྱུ་ཞིག་བྱུང་ན།།<br>ཟག་ཕུང་ལུས་ཀྱི་འདུ་བྱེད་གཞོན་དུས་ནས་རྫོགས་ཀྱང་།།<br>འགྱོད་མེད་སེམས་ཤུགས་བཅངས་པ་ཁ་ཕོ་ཙམ་མིན་མོད།།<br><br>སྔོན་གྱི་ལས་སམ་འཕྲལ་རྐྱེན་གང་ཞིག་གི་དབང་གིས།།<br>ད་ལྟ་ཉིན་མཚན་སྦྲེལ་ཏེ་མནོག(༡)ཆུང་གི་ལས་ཀར།།<br>ལུས་སེམས་འདུ་འགོད་གཞན་གྱི་ཁ་གཏོགས་ཀྱི་འོག་ཏུ།།<br>ལོ་ཟླའི་ཕྲེང་བ་གཅིག་འཐིམ་གཉིས་ཟད་དུ་འགྲོའོ།།<br><br>ཡུན་རིང་ཆོས་ཀྱི་འབེལ་གཏམ་ཤ་ཐང་དུ་མོལ་སའི།།<br>ཆོས་མཐུན་རིགས་སྨྲའི་འདུས་ཚོགས་མདུན་སྐྱོད་ཀྱི་གོམ་སྒྲ།།<br>ཡང་ཡང་ཆ་འཕྲིན་བརྒྱུད་ནས་མཐོང་ཐོས་སུ་བྱུང་ཚེ།།<br>ཡིད་ཀྱི་རྟ་ཕོ་འདྲོགས་ནས་འདུལ་ཐབས་རང་དཀའ་འོ།།<br><br>ཐོས་པའི་མིག་འབྲས་སྟོར་བའི་ངང་ཚུལ་ནི་བསམ་ཚེ།།<br>རང་སེམས་དམུས་ལོང་ཡིན་པའི་ན་ཟིག་ནི་ཆེ་ཡང་།།<br>གང་བསགས་ལས་ཀྱི་རྣམ་པར་སྨིན་པ་ཡིན་བསམ་ན།།<br>ལྟོས་འཇོག་འོས་འཚམ་ཡིན་པའི་བྱ་བཞག་འདིར་འཐམ་དགོས།།<br><br>གཞན་གྱི་ངོ་བསྲུང་མེད་པར་གཞུང་དྲང་གི་ངང་དུ།།<br>སྤྱི་དོན་ཅི་ལྕོགས་བསྒྲུབ་པ་མིར་སྐྱེས་པའི་དོན་གོ།།<br>འོན་ཏང་འཆད་ཉན་ལས་ཀ་བསྐྱུར་དགོས་ཚུལ་བསམ་ན།།<br>སྙིང་རྩ་གྲི་ཡིས་གཅོད་འདྲའི་ན་ཟུག་ནི་ཆེའོ།།<br><br>དེ་ལྟར་རང་བྱ་བསམ་ན་རང་ཉིད་ལ་ཡི་མུག།<br>གཞན་བྱ་བསམ་ན་གཞན་ཡང་བྲིད་ངེས་སུ་དོགས་པས།།<br>ད་ནི་སྐྱིད་སྡུག་ཅི་བྱུང་བླ་མ་མཁྱེན་སྙམ་དུ།།<br>གདུང་དབྱངས་གཅིག་གིས་ཉི་མ་འཕུད་སྙིང་ལས་མི་འདོད།།<br><br>༢༠༡༨/༧/༡༩ཉིན།<br><br></h3>