<h3> “嘭”个一声巨响，一股白烟辣末生头窜出来，吓了我一跳。戳那，尼多(耳朵)也要拨伊振聋塔了。一看，原来是爆炒米花额小贩套了只麻袋辣嗨开炉膛。<br></h3><div> 记得小辰光，炒米花、年糕片是阿拉顶欢喜呃零食了。一帮小宁（人）辣嗨弄堂里白相，老远看到来了个爆炒米花额宁（人），快点回到屋里拉了大宁（人）额手，吵了要吃炒米花。一般要到快过年额辰光，大宁（人）才会满足小宁（人）格点小愿望。</div><div> 大宁（人）到屋里厢额米缸里去摇了一点洋籼米，乃点要过年吃额年糕片干，再包几片糖精片，拉了小宁（人）去排队了。爆炒米花额家生是一只有柄额土园形空心铁炉，横了嗨放了一只煤炭炉上，旁边连牢一只拉风箱。爆炒米花额宁（人）立了炉子前头，一只手打开格只空心铁球，一只手接过（人）宁家手里厢个半罐头米倒了铁球里，再笃两片糖精片进去，然后双手用力乃格只铁球盖头扣牢密封起来。小贩笃悠悠坐勒小凳子浪，眼皮半开间，嘴巴里斜叼一根光荣牌香烟，右手拉风箱，左手捏牢铁球额柄，开始一圈圈转动起来。格只铁球勒嗨煤炭炉上边转边烤，一歇歇辰光，小贩拎了根短铁棍立起来，大家一看，晓得要开炉膛了，两只手快点捂牢尼多（耳朵）。只看到小贩，乃铁球从煤炭炉上轻轻卸下來放进一只麻袋里，然后中气十足叫一声“响啦”，短铁棍用足力气勒铁球盖头浪一转，只听到“嘭”个一声巨响，香米道混了浓烟一道窜出来，所有個米粒子全部从铁球里喷出来落了麻袋里。爆炒米花额小贩顺手拎起麻袋，抖一抖，然后乃爆好個炒米花全部倒进了篮头里，排了第一个额宁（人）马上乃篮头接过去，钞票付特，讲声谢谢侬，然后大宁（人）小宁（人）拎了篮头开开心心回去吃炒米花了。格嗰生意好得不得了，每趟总归要排队等交关辰光，勿过大家侪愿意等额。侬看轧点小宁（人），吃了用糖精片爆出来额炒米花得仔年糕片，甜咪咪来笑嘻嘻，多少开心啊。</div><div> “爆炒米花——”</div><div>附</div><div>上海童年 - 顶楼的马戏团</div><div>今朝阿拉两噶头拿起一把木琴 </div><div>来唱唱阿拉一道经历过额童年 </div><div>男小歪请侬点好打火机 </div><div>小姑娘准备卫生巾擦眼泪</div><div>六月里落雨是黄梅天 </div><div>踏脚踏车出去记牢带雨披 </div><div>到老虎灶泡冰水拖只热水瓶 </div><div>袋袋里藏了两角钱，还要一直摸摸伊</div><div>十月一号男女同学看灯去 </div><div>人人拿只塑料榔头拼命敲来敲去 </div><div>想吃大闸蟹就要等到秋风起 </div><div>切好生姜拌好醋，用蟹脚蘸蘸伊</div><div>玉佛寺烧头香一定是大年夜夜里， </div><div>搓搓通宵麻将迎来新年第一天 </div><div>小朋友约好到楼下头放炮仗去 </div><div>心里想今年伐晓得好拿多少压岁钱</div><div>一到春天就悉悉索索落毛毛雨 </div><div>谈朋友么地方，只好去外滩庇一庇 </div><div>情人墙一对对也是道好风景 </div><div>最吓拿子手电筒晃伐晃伐额联防队员</div><div>到大光明电影院去孵冷气， </div><div>盖好毛巾毯，防止打喷嚏 </div><div>一跑出来就看到对面肯德基 </div><div>帮大人讲我不吃只想进去，小个便</div><div>每趟我走过红房子西餐厅 </div><div>馋唾水总归是落了嗒嗒滴 </div><div>我晓得就算我考着了第一名 </div><div>爸爸妈妈也不舍得带我去</div><div>72家房客住了一幢房子里 </div><div>夜里听到怪声音是亭子间小夫妻 </div><div>我鼎要好额朋友爷娘不在伊身边 </div><div>伊讲伊是啥额――“知青子女”</div><div>隔壁老张买了台14寸电视机 </div><div>搞不懂电视机前头为啥要摆个放大镜 </div><div>屏幕高头有雪花，就拿天线转转伊 </div><div>要是图像没了只好拿电视机敲两记</div><div>（各就是阿拉额上海童年天天裁噶</div><div>有劲或许阿拉小辰光在人民广场见过面）</div><div>美影厂额动画片感动了多少小人 </div><div>等西岳奇童下集等了几十年 </div><div>再大点就盯牢排球女将、西游记 </div><div>一个暑假下来，只好去配眼镜</div><div>最欢喜听姚慕双周柏春的滑稽戏 </div><div>姚慕双就住了阿拉弄堂里 </div><div>帮我从小剃头剃到大的是个江北人 </div><div>一边夸我头大聪明，一边骂“妈辣个逼”</div><div>大清早去读书轧了公交车里 </div><div>小姑娘要当心，有人会摸来摸去 </div><div>后来总算盼到了地铁一号线 </div><div>到今朝已经被“从”脱了十七八只新手机</div><div>中学到中图门口去买轧片 </div><div>我再晓得搞摇滚额裁是帮神经病 </div><div>最老卵就是男同学们一道吃香烟 </div><div>大家凑钞票买包大前门，嗦嗦伊</div><div>（各就是阿拉额上海童年天天裁噶</div><div>有劲或许阿拉小辰光来西郊公园见过面）</div><div>来我额印象里，妈妈一直了嗨织绒线 </div><div>要么就是我陪妈妈拆绒线让伊开心 </div><div>伊讲哎辰光买一台子菜用不着一块钱 </div><div>现在大概只好咬半根盐水棒冰</div><div>四大金刚当早饭永远吃不厌 </div><div>粢饭配油条，咸浆里多摆点虾皮 </div><div>要是窝里有亲眷到上海住两天 </div><div>总要带伊拉去吃吃喷喷香额小笼生煎</div><div>上海哪能就让人噶欢喜 </div><div>从静安到杨浦还有浦东新区 </div><div>有辰光稍许让人有点惹气 </div><div>但是就算蹲一辈子也不会觉着厌</div><div>（这就是阿拉额上海童年天天裁噶</div><div>有劲或许阿拉小辰光在陆家嘴见过面</div><div>这就是阿拉额上海童年天天哪能就噶有劲</div><div>或许阿拉小辰光在彭浦新村见过面）</div><div>曾经一个玉树临风的摇滚青年 </div><div>现在也已经开始秃顶 </div><div>慢慢变成一个发福额摇滚中年 </div><div>来唱唱我的童年拨侬，随便听听</div><div>要是侬没兴趣，就请出去吃香烟 </div><div>如果你也感动，就丢点硬币 </div><div>现在日脚是过了再也没老早轧有劲 </div><div>挺下来额就是阿拉这些长不大的上海小宁</div><div><br></div><div><br></div><div><br></div>