男:
一想情人好心伤，
夜夜想妹到天光，
先日当初发过誓，
样般妹子心岸狼。
女:
阿哥唔使岸悲伤，
老妹同汝讲分详，
齐家分手为汝好，
拆散汝家唔应当。 男:
二想情人心里慌，
夜里青眼到天光，
样般老妹心岸恨，
恨心舍得多情郎。
女:
涯话阿哥唔使慌，
妹子把你放心上，
同汝分手涯心痛，
十分难舍有情郎。 男:
三想情人泪汪汪，
夜深人静喑思量，
两人牵手十几载，
今日离别痛心肠。
女:
看到阿哥泪汪汪，
老妹独自暗悲伤，
涯知阿哥有情义，
分别好比刀割肠。 男:
四想情人岸绝情，
今日翻脸唔认人，
两人相爱有岸久，
汝话断情就断情。
女:
阿哥莫怪涯绝情，
无奈两人有家庭，
旁人佢爱讲闲话，
搞到矛面来见人。 男:
五想情人二月天，
想到阿哥发狂癫，
平时两人感情好，
今日分手泪涟涟。
女:
看到阿哥发狂癫，
涯想回到汝身边，
好想细声同哥讲，
老妹爱你在心田。 男:
六想情人在三更，
半夜醒来心里惊，
梦里常常同下嬲，
见妹唔到心滑冷。
女:
涯话阿哥心莫冷，
涯也梦里常惊醒，
醒来唔见亲哥面，
目汁双流面括青。 男:
七想情人在四更，
心里想妹唔敢声，
话涯唔准打电话，
问妹想同慢人行。
女:
哥问涯同慢人行，
涯今老实话汝听，
妹子感情好专一，
再唔喂同别人行。 男:
八想情人在五更，
静静细听鸡啼声，
涯今想妹岸辛苦，
试问老妹汝知盲。
女:
五更听到鸡啼声，
老妹醒来心着惊，
明知阿哥对涯好，
藏在心里唔敢声。 男:
九想情人天大光，
想到头晕又脑漲，
先日汝话对涯好，
样般今日变心肠。
女:
五更一过就天光，
涯望阿哥爱健康，
希望阿哥爱理解，
老妹无意把哥伤。 男:
十想情人在心田，
心里想妹唔敢言，
都怪自家矛本事，
穷人难配嫩娇连。
。 女:
涯话情哥莫乱言，
老妹苦闷在心田，
唔怪阿哥矛本事，
只怪两人缘分浅。