<h3>ཀུན་སྤྱོད་ལ་ཁ་གསབ་བྱེད་པ་ནི་ནུས་པའི་སྐྱོན་ཆ་ཞིག་དང་།ནུས་པས་གང་ལ་ཡང་གཡོ་འགེལ་བྱེད་པ་ནི་ཀུན་སྤྱོད་ཀྱི་སྐྱོན་ཆ་ཞིག་རེད།འོན་ཀྱང་བྱིས་པའི་ཆེས་ལེགས་པའི་སྤྱོད་བཟང་གི་ཚད་གཞི་ནི།ཁོའི་ཁྱིམ་ཚང་གི་སློབ་གསོ་ལ་འབྲེལ་བ་དམ་ཟབ་ཡོད་པ་ཞིག་ཡིན།དགེ་རྒན་ནི་སློབ་མར་ཤེས་བྱ་བརྒྱུད་སྤྲོད་དང་དོགས་གནད་སེལ་མཁན་ཞིག་ཡིན་པ་མ་གཏོགས།ཡོད་ཚད་སྐྱོན་བྲལ་གྱིས་ངང་ནས་སློབ་མ་གསོ་སྐྱོང་བྱེད་མཁན་ཞིག་གཏན་ནས་མིན།ཁྱིམ་བདག་ནི་བྱིས་པའི་མི་ཚེ་གང་བོར་ཤུགས་རྐྱེན་ཐེབས་མཁན་གྱི་མི་དེ་ཡིན་པས།ཕ་མའི་ལུས་ངག་གི་དཔེ་སྟོན་དང་བྱེད་སྟངས་སྣ་ཚོགས་ནི།ནམ་ཡང་དགེ་རྒན་གྱི་སྐར་བཞི་ཅུ་ཞེ་ལྔའི་སློབ་ཁང་སློབ་གསོ་ལས་ཤུགས་རྐྱེན་ཐེབས་ཚད་ཆེ་བ་ཡིན།དེར་བརྟེན་རང་གི་བྱིས་པར་སྤྱོད་ལམ་བཟང་བོ་ཞིག་ཡོད་འདོད་ན།ཁྱིམ་ཚང་སློབ་གསོ་ནི་ཆེས་འགག་རྩར་གྱུར་ཡོད་པས།བྱིས་པའི་སློབ་སྦྱོང་དང་རིག་སྟོབས་འཕེལ་རྒྱས།མི་གཤིས་གསོ་སྐྱོང་སོགས་ལ་ཁྱིམ་བདག་གིས་ནུས་ཤུགས་གཙོ་བོ་འདོན་དགོས་པ་ལས།དགེ་རྒན་ཁོ་ནས་སྒྲུབ་ཐུབ་པ་ཞིག་གཏན་ནས་མིན།</h3> <h3>མིག་མངས་རྩེད་པ་དང་བརྙན་འཕྲིན་འཕྲུལ་ཆས་ཀྱི་མདུན་དུ་ནར་སོན་པའི་བྱིས་པ་དང་།སློབ་གསོར་སྤྲོ་བ་ཡོད་ལ་དཔེ་ཀློག་ལ་དུངས་བ་ཡོད་པའི་ཁྱིམ་བདག་གིས་སློབ་གསོ་སྤྲད་པའི་བྱིས་པ་གཉིས་ལ་ཁྱད་པར་ཆེན་པོ་ཡོད་པ་ཡིན།དེའི་རྒྱུ་མཚན་ནི།ཁྱིམ་བདག་མང་བོ་ཞིག་གིས་ཕྱོགས་གཅིག་ནས་རང་ཉིད་ཀྱིས་བརྙན་འཕྲིན་ལ་ལྟ་བ་དང་།ཕྱོགས་གཞན་ཞིག་ནས་བྱིས་པར་ནན་ཏན་གྱི་དཔེ་ཀློག་བྱེད་དུ་འཇུག་སྐབས་ནམ་རྒྱུན་བྱིས་པ་དང་འགལ་ཟླའི་སེམས་འགྱུ་བྱུང་བ་ཡིན།དེ་ནི་ཁྱིམ་བདག་གིས་བྱིས་པའི་སེམས་ཁམས་ལ་རྟོགས་ཞིབ་མི་བྱེད་པར།རང་ཉིད་ཀྱིས་སྒྲུབ་མི་ཐུབ་པའི་བྱ་བ་མཐའ་དག ཅིའི་ཕྱིར་བཙན་ཤུགས་ཀྱིས་བྱིས་པར་བསྒྲུབ་ཏུ་འཇུག་པ་ཡིན།</h3> <h3>ཕ་མ་ཡར་རྒྱས་བརྩོན་ལེན་དང་འཚོ་བའི་གོམས་གཤིས་ལེགས་པོ་ཡོད་པ་ཞིག་ཡིན་ན།དེའི་བྱིས་པའང་སློབ་སྦྱོང་ལ་དགའ་བ་མ་ཟད།ལུགས་མཐུན་གྱི་ངང་ནས་རང་ཉིད་ཀྱིས་དུས་ཚོད་ཀྱང་བཀོད་སྒྲིག་བྱེད་ཐུབ་པ་ཡིན།དེ་ལྟར་ཡིན་ན་ཕ་མས་བྱིས་པར་སློབ་གསོ་གཏོང་བའི་སེམས་ངལ་ཇེ་ཡང་དུ་གཏོང་ཐུབ་པ་ཡིན།འོན་ཀྱང་ཁྱོད་ཀྱིས་བསམ་བློ་བཞི་གསུམ་བཅུ་གཉིས་དང་བློ་རྩལ་ཉི་ཤུ་རྩ་ལྔས།རང་གི་བྱིས་པའི་སྟེང་གི་སྐྱོན་ཆ་མཐའ་དག་སེལ་བསམ་ན།ཐོག་མར་ཕ་མ་ཚོས་རང་གིས་རང་ཉིད་ལ་སྐྱོན་བརྗོད་བྱ་དགོས་ལ།ད་གཟོད་བྱིས་པའི་སྟེང་གི་སྐྱོན་ཆའི་འབྱུང་རྩ་གང་ཡིན་པ་འཚོལ་ཐུབ་ངེས་ཡིན།དེ་བས་བྱིས་པའི་ཀུན་སྤྱོད་ལེགས་མིན་གྱི་འབྱུང་རྩ་ནི་ཕ་མ་དང་དེ་འབྲེལ་གྱི་བཟའ་མི་ཚང་མ་ཡིན་རྐྱེན།དགེ་རྒན་གྱིས་སློབ་གྲྭ་ལས་དུས་ཚོད་ཐུང་ཐུང་ཞིག་གི་ནང་དུ་ཁྱོད་ཀྱི་བྱིས་པར་གོམས་གཤིས་བཟང་བོ་ཞིག་མྱུར་ཏུ་སྤྲོད་ཐབས་མེད།</h3> <h3>ཁྱིམ་བདག་མང་ཆེ་བས་རང་ཉིད་ཀྱི་བྱིས་པ་སློབ་སྦྱོང་ལ་མི་དགའ་བ་དང་དཔེ་ཆ་ལྟ་རྒྱུར་སྤྲོ་བ་མེད་པར་འཁང་ར་བྱེད་ཀྱིན་ཡོད་མོད།འོན་ཀྱང་ཁྱིམ་བདག་གིས་སེམས་གཏིང་ནས་རང་ཉིད་ཀྱིས་རང་ཉིད་ལ་དྲི་བ་མི་གཏོང་བ་མ་ཟད།ཁྱིམ་བདག་རང་ཉིད་དཔེ་ཆར་བལྟ་རྒྱུར་དགའ་འམ་མི་དགའ་བའི་གནས་སྟངས་ལ་བསམ་གཞིགས་མི་བྱེད་པ་ཡིན།བྱིས་པའི་དཔེ་ཀློག་གི་སྤྲོ་སྣང་ནི་ཆུང་དུས་ནས་བསྐྱེད་བསྲིང་བྱེད་དགོས་པ་ཞིག་སྟེ།བྱིས་པ་ལོ་གཉིས་ནས་གསུམ་གྱི་སྟེང་ནས་མགོ་བཙུགས་ཏེ་དཔེ་ཀློག་བྱེད་དུ་འཇུག་དགོས་པ་ལས།ཁྱོད་ཀྱིས་སྒུག་ནས་བྱིས་པ་སློབ་གྲྭར་སོང་རྗེས་དགེ་རྒན་གྱིས་ཁྱེད་རང་གི་བྱིས་པར་དཔེ་ཀློག་གི་གོམས་གཤིས་གསོ་སྐྱོང་བྱེད་པར་རེ་བཅོལ་གཏན་ནས་བྱེད་མི་ཉན།</h3> <h3>ཁྱེད་རང་གི་ཁྱིམ་ན་དཔེ་ཆ་ཇི་ལྟར་མང་ན་བྱིས་པས་དཔེ་ཀློག་བྱས་པའང་དེ་ལྟར་མང་བ་ཡིན།ཕ་མས་བྱིས་པར་དཔེ་སྟོན་གྱི་ནུས་པ་གལ་ཆེན་ཞིག་དང་སྣེ་ཁྲིད་ཀྱི་གོམས་གཤིས་མི་དམན་པ་ཞིག་ཐོན་ཐུབ་པས།བྱིས་པས་དེ་རིགས་ལ་ནུས་ལྡན་གྱི་ལད་མོ་བྱེད་པ་ཡིན།དེ་ལས་ལྡོག་སྟེ་བྱིས་པས་ཁྱོད་ཀྱིས་དོན་དག་གཞན་པ་སྒྲུབ་པར་ཁོ་ན་ལ་ལད་ཟློས་བྱས་པ་ཡིན་ན།ཆུང་དུས་ནས་དཔེ་ཀློག་གི་ཉམས་ཚེ།བྱིས་པའི་ཤེས་རྟོགས་ཀྱི་ནུས་པ་དང་རྩོམ་ཡིག་འབྲི་བའི་ཆུ་ཚད་ཀྱི་ཐོག་ནས་ཀྱང་བྱིས་པ་དང་བྱིས་པའི་བར་ལ་ཁྱད་པར་ཆེན་པོ་ཤོར་འགྲོ་བ་ཡིན།</h3> <h3>མདོར་ན།ཆེས་བཟང་བའི་དགེ་རྒན་ཞིག་གིས།བྱིས་པར་ཕྱོགས་གང་ཐད་ནས་ཤུགས་རྐྱེན་ལེགས་པོ་ཞིག་འཇོག་པའི་དུས་ཚད་ནི་ལོ་ངོ་གསུམ་ནས་ལྔའི་བར་མ་གཏོགས་མེད་པ་ཡིན།འོན་ཀྱང་ཁྱིམ་བདག་གིས་བྱིས་པར་ཤུགས་རྐྱེན་ཐེབས་ནུས་ཀྱི་དུས་ཚོད་ནི་མི་ཚེ་ཧྲིལ་བོ་ཡིན་པ་ཤེས་དགོས།ཁྱོད་ཀྱི་བྱིས་པ་ནི་དགེ་རྒན་གྱི་ཁུར་བོ་མིན་ལ།གཅེས་ཕྲུག་ཀྱང་དེ་བས་མིན།དེ་ནི་ཁྱིམ་བདག་ཁྱོད་རང་ཉིད་ཀྱིས་རེ་བཅོལ་བྱེད་སའི་གཅེས་ལོ་ཤ་སྟག་ཡིན།ཁྱིམ་བདག་ནི་ནམ་ཡང་རང་ཉིད་ཀྱི་བྱིས་པའི་དགེ་རྒན་དང་པོ་ཡིན་ལ།ནམ་ཡང་བྱིས་པའི་མིག་དཔེ་ལྟ་སའི་སྟོན་པ་ལྟ་བུ་ཡིན་པས།ཁྱོད་རང་ནམ་ཡང་ཚད་ལྡན་གྱི་ཕ་མ་ཞིག་བྱེད་པར་རེ་བ་ཤིན་ཏུ་ཆེ།</h3><h3>བརྒྱ་བཤད་ཚིག་གི་རྩ་བ།སྟོང་བྱུགས་འོ་མའི་མར་ལོ་ནི་ཁྱོད་ཀྱི་བྱིས་པ་ནི་དགེ་རྒན་གྱིས་ཁུར་དུ་ལེན་པའི་བྱིས་པ་མང་བོའི་ནང་གི་གཅིག་ཡིན་ལ།དགེ་རྒན་གྱིས་ཁྱོད་ཀྱི་བྱིས་པར་སློབ་གསོ་གཏོང་བ་ནི་ཁོའི་བྱ་བ་མཐའ་དག་གི་ནང་ནས་གྲུབ་ཆ་གཅིག་ཡིན་པ་ལས།ཁྱོད་ཀྱི་བྱིས་པ་གཅིག་པུ་དགེ་རྒན་གྱི་བྱ་བའི་ཡོད་ཚད་མིན་པ་ཤེས་དགོས།འོན་ཀྱང་ཁྱིམ་བདག་ཁྱོད་ནི་དགེ་རྒན་དང་གཏན་ནས་མི་འདྲ་བ་མ་ཟད།བྱིས་པ་ནི་ཁྱོད་ཀྱི་མ་འོངས་པའི་ཡོད་ཚད་ཡིན་པས་སོ།།རྒྱུ་མཚན་དེའི་དབང་གིས་རང་གི་བྱིས་པར་སློབ་གསོ་ལེགས་པོ་ཞིག་གཏོང་རྒྱུ་ནི་ཁྱོད་ཀྱི་ལས་དོན་གལ་ཆེན་ཞིག་ཡིན།</h3> <h3>རྨ་ཆུ་རྫོང་དངུལ་རྭ་ཞང་བཅའ་སྡོད་སློབ་གྲྭའི་སློབ་མའི་གནས་ཚུལ་ལ་རྒྱུས་ལོན་བྱས་པ།</h3><h3><br /></h3><h3><br /></h3><h3> 2018.3.19</h3><h3>ཀུན་སྤྱོད་ཁང་ནས།</h3>